To Be More Like Jesus - D.E.N.Y. Yourself

To Be More Like Jesus - Deny Yourself
Tinuro ni Pastor Arnel D. Pinasas


            Naalala ko nang bata pa ako, kaming magkakapatid panay ang sipsip namin sa mga magulang namin para mabili o makuha namin yung gusto namin. Madali itong mangyayari kapag natuwa o nalugod sila sa amin.  Kaya kanya-kanya kaming pakitang gilas. Alam kong alam nyo ang pakiramdan na ito - ang maging kalugod-lugod sa isang tao. At alam kong isa sa gusto nating mabigyan ng kaluguran ay ang Diyos lalo na kapag meron tayong isang bagay na gustong makuha sa Kanya. Pero sana makita natin na hindi lang sa materyal na bagay ang dahilan kung bakit gusto nating maging kalugod-lugod sa Diyos bagay na titignan natin mamaya.

Paano ba maging kalugud-lugod?

            Kung gusto nating maging kalugud-lugod dapat gayahin natin si Jesus na Sya namang layunin ng Diyos sa ating lahat. Dahil si Jesus ay nakitang naging kalugod-lugod sa Diyos.

2 Pedro 1:17
“…nang tanggapin Niya mula sa Ama ang karangalan at kapurihan. Ito’y nangyari nang marinig namin ang tinig mula sa dakilang kaluwalhatian ng langit na nagsabing, ‘Ito ang minamahal Kong Anak na lubos Kong kinalulugdan.’”

Bakit Siya naging kalugod-lugod?

Juan 8:29
“sapagkat lagi Kong ginagawa ang kalugud-lugod sa Kanya.”

            Pinagpala ka kung malugod sayo ang Diyos. Kaya lang marami ang natatakot na magin katulad ni Jesus. Bakit? Dahil sa mga nakita nating naranasan Niya.

Juan 15:20
“Alalahanin ninyo ang sinasabi Kong ito: walang aliping nakakahigit kaysa sa kanyang panginoon. Kung Ako’y inusig nila, uusigin din nila kayo. Kung sinunod nila ang Aking sinabi, susundin rin nila ang inyong sasabihin.”

Mateo 10:25
“Kung ang ama ng sambahayan ay tinawag nilang Beelzebul, lalo nang lalaitin nila ang kanyang mga kasambahay.”

            Kaya marami ang natatakot na mamuhay na tulad ni Jesus at mas pinipili nalang ang makisama sa gawa ng makasalanan kaysa sila ay usigin at laitin dahil sa pagsunod kay Jesus. Kung ganito ka nasa delikado kang kalagayan. Kailangan mo talagang maunawaan kung ano ang kalooban ng Diyos patungkol sa mga bagay na ito.

Roma 8:28-29
28. Alam nating sa lahat ng bagay ay gumagawa ang Diyos para sa ikabubuti ng mga nagmamahal sa Kanya, silang mga tinawag ayon sa Kanyang layunin. 29 Sapagkat sa mula’t mula pa’y alam na ng Diyos kung sino ang magiging Kanya at ang mga ito’y pinili upang maging tulad ng kanyang Anak. Sa gayon, ang Anak ang naging panganay sa lahat ng maraming magkakapatid.”

            Layunin Niyang tayo’y maging katulad ng Kanyang Anak na si Jesus. Habang sumusunod tayo kay Jesus, nagsisimula tayong mas maging katulad Niya; at habang mas nagiging katulad tayo ni Jesus, mas hindi tayo nagiging katulad ng mundo.

Papaano mangyayari ang mga bagay na ito?

Lucas 9:23
“At sinabi Niya sa kanilang lahat, ‘Ang sinumang nagnanais sumunod sa Akin ay kinakailangang itakwil niya ang kanyang sarili, pasanin araw-araw ang kanyang krus, at sumunod sa Akin.”

Kaya ang ating pag-aaralan sa araw na ito ay - “To Be More Like Jesus - DENY yourself”

How to deny ourselves? by D.E.N.Y.

I. Doing Christ example

Filipos 2:5-8
“5 Nawa’y magkaroon kayo ng kaisipan na tulad ng kay Cristo Jesus. 6 Kahit Siya’y likas at tunay na Diyos, hindi Niya ipinagpilitang manatiling kapantay ng Diyos. 7 Sa halip, kusa Niyang hinubad ang pagiging kapantay ng Diyos, at naging katulad ng isang alipin. Ipinanganak Siyang tulad ng mga karaniwang tao. At nang si Cristo’y maging tao, 8 nagpakumbaba Siya at naging masunurin hanggang kamatayan, maging ito man ay kamatayan sa krus.”

            Si Jesus ay nag iwan ng perpektong halimbawa ng pagtakwil sa Sarili. Ang salitang pagtakwil sa sarili ay isang salita ng kahinahaan sa ating panahon. Sa mundo na ang mga nagawa ang nagiging batayan ng pagiging tanyag at tagumpay ay minsang nauuwi sa pagmamataas at pagtapak sa iba marating lamang ang bagay ng ito.

            Kung hindi tayo nagiging maingat, araw-araw ay sinasanay tayo ni satanas na mahirapang itakwil ang ating sarili sa pamamagitan ng mga di-napapansing ginagawa at kinahuhumalingan araw-araw. Halimbawa nito ay mga Social Media tulad ng Facebook kung saan lahat ay nagiging uhaw sa likes ng iba; Mga nauusong laro gaya ng Mobile Legends na kung saan mas tumataas ang pagnanais na mas maging angat sa iba.

            Mahirap sa atin ang itakwil ang sarili para sa paglilingkod sa iba lalo na kung mataas ang antas natin sa buhay. Ngunit nag iwan si Jesus ng isang halimbawang dapat tularan.

Juan 13:13-17
13 Tinatawag ninyo Akong Guro at Panginoon, at tama kayo, sapagkat Ako nga iyon. 14 Dahil Akong Panginoon at Guro ninyo ay naghugas ng inyong mga paa, dapat din ninyong gawin ito sa isa’t isa. 15 Binigyan Ko kayo ng halimbawa upang inyong tularan. 16 Pakatandaan ninyo, ang alipin ay hindi nakakahigit sa kanyang  panginoon, ni ang sinugo kaysa sa nagsugo sa kanya. 17 Mapalad kayo kung nauunawaan ninyo ang mga bagay na ito at inyong gagawin.”

           Nauunawaan nyo ba ang sinasabi ni Jesus? Tanda na kung nauunawaan natin ito ay sinasagawa natin ito; ginagaya natin si Jesus. At kapag ginawa natin ito mapalad tayo. Pagtakwil sa sarili, pagpapakumbaba, paglilingkod at pagmamahal - ito ang mga katangiang pinakita ni Jesus na dapat nating tularan.

II. Exchanging your desire for greater Joy

            Iniisip ng iba na ayaw ng Diyos na maging masaya tayo, na puro church lang, puro gawain lang, madaming bawal, kaya marami nagsasabi boring daw ang maging Kristiyano. Pero dapat nating makita na ang Diyos ay may magandang plano sa atin at ito ay mabuti para sa atin.   

Jeremias 29:11
“Sapagkat batid kong lubos ang mga plano ko para sa inyo; mga planong hindi ninyo ikakasama kundi para sa inyong ikabubuti. Ito’y mga planong magdudulot sa inyo ng kinabukasang punung-punno ng pag-asa.”       

            Pero ito si Satanas, gaya ng una niyang ginawa kay Eba at Adan, naglagay siya ng pagdududa sa bawat isa sa atin sa mga salitang ito ng Diyos. Talaga bang sa ikakabuti mo ang pagsunod sa plano ng Diyos? “Dumadami na ang nawewerduhan sayo, dumadami na haters mo, dumadami ng ayaw sayo. Ang kj mo, ayaw mong makisama, kaya tigilan mo na ang mga bagay na yan.” Pero kagaya ng kwento ni Eba at Adan na nakinig sa panlilinlang ng ahas, sa dulo malalaman mo na nilayo ka nito sa magandang plano’t biyaya ng Diyos sa buhay mo.

            Pag tayo nagkakamali sa dulo dahil sa pakikinig natin kay satanas madalas nasasabi natin na, “akala ko kasi.” Minsan nakakapagod yung lagi kang talunan kasi laging ikaw ang nasusunod at hindi si Jesus sa buhay mo.May kailangan lang tayong gawin para matigil ito. Katulad ni Eba kailangan nating palitan ang ating sariling pagnanais. Nang linlangin ni Satanas si Eba, isa sa mga dahilan kung bakit ang bilis niyang mahulog dito dahil sa kanyang sariling pagnanasa.

Genesis 3:6
“Naisip din niya na kahanga-hanga ang maging marunon, kaya’t pumitas siya ng bunga at kumain nito.”

At ito ay nasa ating lahat, itong sariling nasa na ito.

Santiago 1:13-14
“Huwag sabihin ninuman na tinutukso siya ng Diyos kapag siya’y dumaranas ng pagsubok, sapagkat ang Diyos ay hindi maaaring matukso at hindi rin naman niya tinutukso ang kahit sino. Natutukso ang tao kapag siya’y naaakit at nagpapatangay sa kanyang sariling nasa.”

            Ito yung dapat nating alisin, yung sariling nasa ng laman, at matutong ipalit o ibalik sa nais ng Diyos na pagmumulan ng tunay na kaligayahan. Ano ang mga kailangan sa pagpapalit para sa higit na kaligayahan?

A. The exchange requires surrender

            Sa panahon natin ang salitang ito ay ayaw natin dahil ito ay salita ng kahinaan at talunan. Pagnarining natin ito nakikita natin ang isang kahariang sumuko sa isang hari na kadalasan nating napapanood. Kaya ayaw na ayaw natin ang salitang ito. Pero muli ito ay parte ng kasinungalingan ni Satanas para ilayo tayo sa magandang plano at biyaya ng Diyos na makakapagbigay ng tunay na kagalakan.

Awit 127:1
“Maliban nga na si Yahweh ang nagtatag nitong bahay, ang ginawa ng nagtayo ay wala ring kabuluhan; maliban nga na si Yahweh ang sa lunsod ay gumabay, ang pagmamasid ng bantay ay wala ring saysay.”

            Maliban na ang Diyos ang hinahayaan mo na maghari sa iyong buhay. Maliban na si Jesus ang masunod sa iyong buhay hindi mapupunta sa walang kabuluhan at saysay ang lahat ng iyong gagawin. Kanina sabi ko naiisip natin na ang pagsuko ay parang katulad sa mga kadalasang napapanood natin na ang sumuko ay nagiging alipin, sunod-sunuran at nabubuhay sa takot. Hindi ito ang mukha ng pagsuko sa Diyos.

Roma 8:15
“Sapagkat hindi ibinigay sa inyo ng Diyos ang Espiritu upang kayo’y gawing mga aliping namumuhay sa takot. Sa halip, ibinigay sa inyo ang Espiritu upang kayo’y gawing mga anak ng Diyos, kaya nakakatawag tayo sa Kanya ng ‘Ama, Ama ko!’”

            Muli, tandaan natin huwag tayong mahulog sa kasinungalingan ni Satanas na ang gusto natin ang dapat masunod at hindi ang Diyos dahil ang Diyos ang tunay na may kontrol at hindi tayo.

Kawikaan 16:9
“Ang tao ang nagbabalak, ngunit si Yahweh ang nagpapatupad.”

B. The exchange requires faith

Isaias 55:8
“Ang sabi ni Yahweh, Ang Aking kaisipa’y hindi ninyo kaisipan, ang inyong kaparaanan ay hindi Ko kaparaanan.”

Roma 8:28
“Alam nating sa lahat ng bagay ay gumagawa ang Diyos para sa ikabubuti ng mga nagmamahal sa Kanya, silang mga tinawag ayon sa Kanyang layunin.”

Kawikaan 3:5-6
“Kay Yahweh ka magtiwala, buong puso’t lubusan, at huwag kang manangan sa sariling karunungan. Sa lahat ng iyong gawain siya nga’y alalahanin, upang ika’y patnubayan sa iyong mga tatahakin.”

III. Never coming back to the old ways

Lucas 9:23
“At sinabi Niya sa kanilang lahat, ‘Ang sinumang nagnanais sumunod sa Akin ay kinakailangang itakwil niya ang kanyang sarili, pasanin araw-araw ang kanyang krus, at sumunod sa Akin.’”

            Pansinin natin ang salitang “araw-araw,” ibig sabihin hindi ito kung kailan trip mo lang. Hindi tayo dapat matulad sa mga Israelita na dumaing sa Diyos dahil sa kahirapang nararanasan sa mga Egipto at nang tinugon sila ng Diyos sa pamamagitan ni Moises at tinulungan silang makalaya sa kamay nila at nang malasap na nila ang ginhawa saka sila muli nagnanais at natatakam sa dati nilang pamumuhay sa kamay ng mga Egipto. Ito ay kahangalan.

Galacia 3:3
“Talagang napakahangal ninyo! Nagsimula na kayo sa Espiritu, at ngayo’y nais pa ninyong magtapos sa pamamagitan ng inyong sariling lakas!”

Kaya ano ang dapat nating gawin?

Colosas 3:5-9
5 Kaya’t dapat nang mawala sa inyo ang mga pagnanasang makalaman, ang pakikiapid, kahalayan, mahalay na simbuyo ng damdamin na isang uri ng pagsamba sa diyus-diyusan. 6 Dahil sa mga ito, tatanggap ng parusa ng Diyos sa kanya. 7 Kayo man ay namuhay din ayon sa mga pitang iyon nang kayo ay pinaghaharian pa ng mga ito. 8 Ngunit ngayon, itakwil na ninyo ang lahat ng galit, poot, at sama ng loob. Iwasan na ninyo ang panlalait at malaswang pananalita. 9 Huwag kayong magsisinungaling sa isa’t isa, sapagkat hinubad na ninyo ang dati ninyong pagkatao, pati ang mga gawa nito.”

Efeso 4:22-24
22 Iwanan na ninyo ang dating pamumuhay. Hubarin na ninyo ang inyong dating pagkatao na napapahamak dahil sa masasamang pagnanasa. 23 Magbago na kayo ng diwa at pag-iisip; 24 at ang dapat ninyong isuot ay ang bagong pagkatao nanilikhang kalarawan ng Diyos, at nahahayag sa matuwid at banal na pamumuhay ayon sa katotohanan.”

            Ano ito? Ang pamumuhay na tulad ni Jesus. Alam kong mahilig tayo sa selfie. Pero huwag mo nang mahalin ang iyong sarili. - tama ba ang sinabi ko? “Pastor hindi, kasi sabi ni Jesus mahalin ninyo ang iba gaya ng pagmamahal nyo sa inyong sarili.” Kaya sabi nila mahalin mo muna ang iyong sarili upang matutunan mong mahalin ang iba. Mali! Dahil matagal na nating mahal ang ating sarili. Sa katunayan na-master na nga natin ito. Pero tandaan natin ito.

Roma 6:6
“Alam natin na ang dati nating pagkatao ay naipako na sa krus kasama Niya, upang mamatay ang ating makasalanang pagkatao at nang hindi na tayo maalipin pa ng kasalanan.”

Wala na ang Arnel, patay na ang Arnel na ang gusto nya ay ang dapat masunod.

Galacia 2:20
“Hindi na ako ang nabubuhay ngayon kundi si Cristo na ang nabubuhay sa akin.  At habang ako’y nabubuhay pa sa katawang-lupa, mamumuhay ako sa pananalig sa Anak ng Diyos na umibig sa akin at naghandog ng buhay para sa akin.”

            Kaya ng sabihin ni Jesus na, “mahalin ninyo ang iba gaya ng pagmamahal nyo sa inyong sarili,” ang gusto Nyang sabihin, “gawin ninyong basehan ang pagmamahal nyo sa iba ang dati ninyong pagmamahal sa sarili na pinatay na sa krus.” Pano nyo ba minahal ang inyong sarili dati? Di ba mas minamahal mo ito ng higit sa iba? Iyan ang gawin natin sa iba.

IV. Yielding ourselves completely to God

Roma 6:12-13
“12 Huwag na ninyong paghariin ang kasalanan sa inyong mga katawang may kamatayan upang hindi na kayo maalipin ng masasamang hilig nito. 13 Huwag na ninyong ipailalim sa kapangyarihan ng kasalanan ang alinmang bahagi ng inyong katawan bilang kasangkapan sa paggawa ng kasamaan. Sa halip, pasakop kayo sa Diyos bilang mga taong namatay na at muling binuhay, at ihandog ninyo sa Kanya ang inyong katawan bilang kasangkapan sa kabutihan.”

            Ihandog ang ating katawan sa kanya? Ibig sabihin God demands complete yield o pagsuko sa Diyos. Talaga bang karapat-dapat Siya sa bagay na iyon? Parang sobrang demand naman iyon. Balikan natin ang tunay na kalalagayan ng taong hiwalay sa Diyos? Di ba ang taong hiwalay sa Diyos ay tiyak na ang buhay na walang-hanggan nila ay igugugol nila sa impyerno? Dito natin makikita kung gaano kalaking habag at biyaya ang natanggap ng mga naligtas.

Roma 12:1
“Kaya nga, mga kapatid, alang-alang sa masaganang habag ng Diyo sa atin, ako’y nakikiusap na ialay ninyo ang inyong sarili bilang isang handog na buhay, banal at kalugud-lugod sa Diyos. Ito ang karapat-dapat na pagsamba ninyo sa Diyos.”

            Hindi ibig sabin nito na lahat tayo mag pastor. Hindi! Simple lang ang mensahe ng Diyos sa atin sa araw na ito - mamuhay tayo na tulad ni Jesus sa lugar kung nasaan tayo ngayon at magiging kalugud-lugod tayo sa Diyos at magiging pagpapala tayo sa iba.


____________________________________

Discussion:

Pagbulayan:

1. Ano ang dahilan kung bakit ninais ni Jesus na itakwil ng mga taong gustong sumunod sa Kanya ang kanilang mga sarili?

2. Ano ang hadlang sa pagnanais nating mamuhay na tulad ni Jesus? Ano ang dapat mong gawin sa mga hadlang na ito?

Pagsasabuhay:

1. Sa apat na paraan para maitakwil natin ang ating sarili, alin dito ang mas pinaka dapat mong gawin? Bakit?

Panalangin:
Ipanalangin mo sa Diyos na tulungan ka na maisabuhay ang pagsasabuhay na iyong binahagi.

Pag-iwas sa T.R.A.P.S.

Pag-iwas sa T.R.A.P.S. 

            Bilang lingkod ng Diyos alam kong gusto nating maging sa kung ano ang gusto ng Diyos sa atin. Pero meron tayong mga patibong na dapat nating iwasan na maaaring humulma sa atin na taliwas sa kung ano ang gusto ng Diyos na maging tayo:

Titles
Relationships
Appearance
Plans
Social Media

            Syempre ang mga bagay na tio ay hindi naman talaga masama, sa katunayan, ang mga ito ay may malaking pagpapala sa ating buhay at nagdadala ng kaluwalhatian sa Panginoon. Ganunpaman, kailangan tayong maging maingat sa kung papaano natin ito hahawakan para hindi tayo mahulma na taliwas sa gusto ng Diyos para sa atin.

I. The Trap of Titles

            Ang problema ay hindi sa title mismo, ang problema ay ang halaga na ibinibigay natin dito. Marami sa atin ang tinuturuan tayo na habulin natin ang mga titulo – mula sa mga propesyonal na katayuan, sa kung sino ang masusunod sa pag-aasawa o sa pagpapalaki ng anak, hanggang sa mga antas ng ministeryo. Maaaring nilalamon na tayo ng mga ganitong hangarin at malamang na ilagay natin ang ating buong pagkakakilanlan at halaga sa mga titulong nakuha natin. Kung gusto nating maging sa kung ano ang pagkakatawag ng Diyos sa atin, kailangan nating kilalanin kung paano tayo nahulog sa isang bitag sa pamamagitan ng maling paniniwala na ang ating mga titulo ang dahilan kung bakit tayo karapat-dapat.

Ang katotohanan:

Katotohanan #1: Bawat titulo ay mahalaga.

            Ang katotohanan ay ipinagkatiwala sa atin ng Diyos ang (mga) titulong ibinigay Niya sa atin sa panahong ito. Walang titulong napakaliit o hindi gaanong mahalaga para sa Kaharian. Ang bawat titulo na ibinigay Niya sa atin ay nag-aambag sa gawaing ginagawa niya sa mundong ito.

Katotohanan #2: Minahal na Tayo

            Itinuring tayo ng Diyos na karapat-dapat na mahalin noong tayo ay nasa sinapupunan pa ng ating ina. Dahil dito, ang ating halaga ay hindi nakabatay sa kung ano ang ating magagawa o ang mga titulong maaari nating makuha. Ang ating kahalagahan ay nakasalalay lamang sa katotohanan na tayo ay Kaniyang nilalang, Kaniyang mga anak, at tayo ay lubos na minamahal.

Katotohanan #3: Ang mga titulo ay mga kasangkapan.

            Ang mga titulo ay mga kasangkapan na ginagamit ng Diyos para sa Kanyang kaluwalhatian. Dapat nating bigyang pansin ang sandali na ang kawalan natin ng titulo ay nagreresulta sa kapaitan o sama ng loob. Kung ang pag-ibig natin sa isang titulo ay nagsisimulang lumampas sa ating pagmamahal sa Diyos, ito ay isang idolo.

Pagsasabuhay:

            Maiiwasan natin ang bitag na ito sa pamamagitan ng pagtingin sa Salita at pagpapahintulot sa katotohanan ng Diyos na tumagos sa ating mga puso at punan ang ating mga baso. Narito ang ilang mga titulong binigay ng Diyos sa atin mula sa Kanyang Salita.

Tinatawag ka ng Diyos na:

·         Pinili (Juan 15:16)
·         Minamahal (Roma 8:37-39)
·         Ang Kanyang Mahal na Pag-aari (Deuteronomio 14:2)
·         sa Kanya (Isaias 43:1) 


II. The Trap of Relationships

            Pagdating sa mga relasyon, lahat tayo ay napunta sa isang punto na natagpuan natin ang ating sarili na nasaktan, nabigo, o nabalisa. Ito ay dahil marami sa atin ang may posibilidad na ilagay ang ating halaga sa kanila. Tinitingnan natin ang ating pamilya, pagkakaibigan o romantikong relasyon upang mapunan ang pinakamalalim na hangarin ng ating puso.

            Ang mga relasyon ay hindi idinisenyo upang matugunan ang lahat ng ating pangangailangan. Sa halip, sila ay idinisenyo upang bigyan tayo ng kaloob ng maka-Diyos na pamayanan. Gayunpaman, kapag tayo ay naudyukan na hangarin ang mga relasyon para sa ating sariling pakinabang kaysa sa Kanyang Kaluwalhatian, ang mga relasyon ay nagiging isang bitag sa halip na maging kayamanan sa kung saan talaga ito nakadisenyo.

Ang katotohanan:

Katotohanan #1: Ang Diyos ay mas maaasahan kaysa sa mga tao.

            Kadalasan, tumitingin tayo sa ating kapareha, sa ating asawa, sa ating kapamilya o matalik na kaibigan upang bigyan tayo ng pagpapatunay, kaaliwan, o pag-apruba na mula lamang sa Diyos. Ang Diyos ay malinaw at pare-pareho sa Kanyang pag-ibig sa atin. Hindi tulad ng ating karanasan sa mga tao, ang Kanyang pagmamahal sa atin ay nakabatay sa Kanyang kabutihan at hindi sa atin.

Katotohanan #2: Matalinong pamantayan > Mahinang pamantayan

            Nais ng Diyos na umunlad tayo sa malusog na relasyon. Kung ang ating pagnanais na magkaroon ng isang relasyon sa isang tao ay batay sa mahinang pamantayan tulad ng kaginhawahan, kalapitan, katayuan o hitsura, dapat nating suriin muli ang ating interes. Ang pinakamahusay na mga relasyon ay binuo sa matalinong pamantayan tulad ng karakter, sakripisyo, malinaw na komunikasyon at pagkakapare-pareho. Ang bawat relasyon ay dapat na binubuo ng mga katangiang may tunay at pangmatagalang halaga.

Katotohanan #3: Masyadong marami ang nakataya.

            Hindi natin maaaring maliitin ang epekto ng mga relasyon sa takbo ng ating buhay. Ang ating mga iniisip, emosyon, at pag-uugali ay regular na naiimpluwensyahan ng mga taong napagpasyahan nating panatilihin sa paligid natin. Sa mga relasyon, dapat nating tiyakin na hinahabol natin ang mga taong kung saan tayo tinawag ng Diyos kaysa sa mga pipiliin natin para sa ating sarili.

Pagsasabuhay:

            Maiiwasan nating mahulog sa mga bitag sa relasyon sa pamamagitan ng pagpapaalala sa ating sarili ng ilang bagay.

1. Ang Diyos lamang ang nagbibigay kasiyahan. Tayo ay buo at kumpleto sa Kanya lamang.

2. Kung hindi natin gusto ang kuwento na sinasabi ng ating mga relasyon, ang pagbabago ng ating pamantayan ay makakatulong sa atin na baguhin ang kuwento.

3. Ang buhay na nagpaparangal sa Diyos ay puno ng mga relasyong nagpaparangal sa Diyos.


III. The Traps of Appearance

            Kapag tumingin ka sa salamin, ano ang nakikita mo? Anong mga iniisip mo tungkol sa iyong mukha, katawan, at balat? Ngayon tanungin ang iyong sarili, "Saan nagmula ang mga paniniwalang ito?"

            Karamihan sa atin ay tinuruan mula sa murang edad natin na ang ating hitsura ang tumutukoy sa ating halaga. Para sa marami sa atin, nagresulta ito sa hindi malusog na mga pananaw sa ating sariling mga katawan, isang patuloy na pangangailangan para sa panlabas na pagpapatunay, at nakapipinsalang mga gawi na idinisenyo upang gawing mas maganda ang pakiramdam natin tungkol sa ating hitsura. Madalas tayong gumugugol ng mas maraming oras sa pagpuna sa ating sarili kaysa sa pagdiriwang kung gaano kaganda at may layunin ang bawat isa sa atin na nilikha ng Diyos.

Ang katotohanan:

Katotohanan #1: Ang Diyos ang Dakilang Magpapalayok.

            Tulad ng luwad o putik, naglaan ng panahon ang Diyos upang hulmahin ang bawat katangian natin. Natuwa Siya sa paglikha sa atin. Tulad ng lahat ng iba pang bahagi ng paglikha, ginawa Niya ang ating pisikal na anyo nang may intensyon. Kailangan nating maniwala na ang ating hitsura ay bahagi ng Kanyang magandang plano para sa atin.

Katotohanan #2: Okay lang ang pagbabago.

            Hindi magtatagal ang ating pagmumukha. Mahirap isipin ito, ngunit ang ating hitsura ay magbabago at tatanda sa paglipas ng panahon - at iyon ay okay. Bagama't maaari tayong magkaroon ng kamalayan sa ating hitsura, hindi natin maaaring hayaang kainin tayo nito. Sa halip, sanayin natin ang pagmamahal sa ating sarili kahit saang yugto man tayo ng buhay.

Katotohanan #3: Mahalaga ang ating mga pamumuhunan.

            Ganap tayong mamuhunan sa hitsura at pakiramdam na maganda sa ating hitsura, ngunit huwag nating pabayaan ang hitsura natin sa loob. Mamuhunan sa kung ano ang pinakamahalaga, ang iyong kaluluwa. Higit pa sa ating panlabas na anyo, ang kalagayan ng ating puso, ang ating integridad, ang ating pagpapagaling at ang ating pagkatao ay ang mga bahagi natin na tatagal.

Pagbulayan:

            Maiiwasan natin ang bitag na ito sa pamamagitan ng paglalaan ng oras upang bumuo ng mga katangiang nagpapalusog sa ating kaluluwa. Tulad ng pagbuo natin ng mga gawain sa pangangalaga sa sarili, kailangan nating sadyang bumuo ng mga gawi na nagmamalasakit sa ating kaluluwa. Maglaan ng oras upang gumawa ng isang lingguhang plano sa pangangalaga sa kaluluwa. Ito ay maaaring sa pamamagitan ng pagkakaroon ng tahimik na oras kasama ang Diyos, pahinga, sa pag-journal at iba pang tulad nito.

IV. The Traps of Plans

“Sapagkat batid Kong lubos ang mga plano Ko para sa inyo; mga planong hindi ninyo ikakasama kundi para sa inyong ikabubuti. Ito'y mga planong magdudulot sa inyo ng kinabukasang punung-puno ng pag-asa.” (Jeremias 29:11)

            Ang magandang kasulatang ito ay nagpapaalala sa atin na ang Diyos ay talagang may plano para sa ating buhay. Kaya bakit nagkakaroon ng pagkakataon sa buhay natin na kinukuha natin ang mga bagay sa ating sariling mga kamay, na para bang mayroon tayong mas mahusay na pananaw, kaalaman, at diskarte kaysa sa Diyos? Sa sandaling magpasya tayong alisin ang ating mga plano sa mga kamay ng Diyos ay ang sandaling magpasya tayong alisin ang Diyos sa ating mga plano. Kapag nilalabanan natin ang tawag na ipagkatiwala ang ating mga plano sa Diyos, mahuhulog tayo sa bitag ng pagdepende sa ating sariling pananaw at lakas upang matukoy ang direksyon ng ating buhay.

Ang katotohanan

Katotohanan #1: Plano ng Diyos = Paglalaan ng Diyos

            Ang Diyos ay isang Master Planner. Idinetalye na niya ang bawat bahagi ng ating buhay at may mga tiyak na plano at probisyon na gagabay sa atin sa bawat bahagi ng paglalakbay. Sa kasamaang palad, marami sa atin ang binabalewala ang Kanyang mga plano para sa ating sarili. Ang pamamaraang ito ay nag-iiwan sa atin ng pagkapagod mula sa pagtatrabaho upang mapanatili ang ating mga plano nang hiwalay sa Diyos. Ang pagsuko sa Diyos at pagsunod sa Kanyang pamumuno ay nangangahulugan na isinusuko natin ang ating mga plano sa Kanyang perpektong pabor, mapagkukunan, at oras.

Katotohanan #2: Ang ating pamantayan ay maaari tayong ilibing

            Ang paniniwala na kailangan nating makamit o matapos ang mga tiyak na layunin sa buhay sa loob ng isang tiyak na panahon ay mapanganib at mapagmataas. Walang masama sa pagkakaroon ng pag-asa at pangarap (na ipinagkatiwala sa Diyos), ngunit dapat tayong maging mas nakatuon sa Kanyang pangitain para sa ating buhay kaysa sa ating sarili.

Katotohanan #3: Ang paghihintay ay sulit.

            Marami sa atin ang umiikot pabalik sa Diyos pagkatapos nating gumawa ng mga desisyon sa pagbabago ng buhay. Dapat tayong maging mabilis na sumangguni sa Diyos sa simula ng bawat kilos sa halip na tanungin Siya pagkatapos ng pagbagsak ng ating mga desisyon.

Pagsasabuhay:

           Ang Diyos ang may pinakamalinaw na pananaw at ang pinakamahusay na kakayahan upang itakda tayo upang magtagumpay sa buhay. Gayunpaman, kung hindi natin ibibigay sa Diyos ang tiwala, hindi tayo kailanman nasa lugar para magtagumpay.


VI. The Trap of Social Media

            Marami sa atin madalas na kapag natapos tayong magbabad ng oras sa social media ay nakakaramdam tayo ng inggit, at kabiguan sa ating buhay na nagdudulot ng pakiramdam na hindi masaya. Nararamdaman natin ito dahil nahulog tayo sa bitag ng paghahambing. Ang social media ay maaaring maging sanhi ng pakiramdam na tila ang lahat ay nabubuhay sa buhay na gusto natin o sa mas masahol pa na pakiramdam na, na nakalimutan tayo ng Diyos o pinagkakaitan tayo ng mga pagpapala. Ito ay mga kasinungalingan mula sa kaaway; naglilingkod tayo sa isang Diyos na nag-aalaga maging sa mga ibon (Mateo 6:26) at sa mga bulaklak ng lupa (Mateo 6:28-33), gaano pa ba tayo magtitiwala na ang ating Ama ay nag-aalaga sa atin at nagbibigay sa atin ng lahat ng kailangan natin?

Ang katotohanan:

Katotohanan #1: Hindi totoo ang Social Media.

            Ang online presence ng isang tao ay hindi tumpak na naglalarawan ng kanilang pang-araw-araw na katotohanan. Sa halip, pinapakita lang nila ang buhay na gusto nilang ibenta sa atin. Ang social media ay madiskarteng idinisenyo upang gawin tayong manabik sa kung ano ang wala tayo at hangarin na maging sa kung hindi ano tayo.

Katotohanan #2: Ang paghahambing ay pumapatay ng saya.

            Ang paghahambing ay ang magnanakaw ng lahat ng kagalakan at kasiyahan dahil itinatakwil nito ang pang-araw-araw na pagpapala, awa, at biyaya ng Diyos. Imbes na ikumpara natin, magtiwala tayo na laging inaalagaan tayo ng Diyos.

Katotohanan #3: Kailangan natin ng karunungan.

            Out of our heart, everything flows. Dapat nating gamitin ang pag-unawa at karunungan sa uri ng nilalaman na ating kinokonsumo dahil kung ano ang ating kinakain ay makakaimpluwensya sa ating buhay. Kapag binabantayan natin ang ating mga puso, hindi lamang natin pinararangalan ang ating sarili, pinararangalan natin ang Diyos.

Pagsasabuhay:

Kapag nalaman mong nahulog ka sa social media trap, maglaan ng ilang sandali sa R.E.S.E.T.:

· Recognize (kilalain kapag ikaw ay nakakaramdam ng inggit o kalungkutan)
· Express (ipahayag ang mga damdaming iyon at maging tapat sa iyong sarili at sa Diyos tungkol sa iyong nararamdaman)
· Seek (humingi ng suporta – ito man ay sa iyong mentor, nagdidisipulo, o sa Bibliya)
· Exit (lumabas sa app at magtakda ng malusog na mga hangganan)
· Tell (sabihin sa iyong sarili ng madalas na "Ang Diyos ay isang mabuti at tapat na Ama")

Buod

Titles

      Pahalagahan ang iyong posisyon bilang anak ng Diyos. Ang mga titulong hindi nakuha ay may higit na bigat kaysa sa anumang titulong matatanggap natin sa Mundong ito.

Relationships

      Hanapin ang pagigingbuo sa Diyos na hiwalay sa pagsang-ayon ng mga tao. Mula sa lugar na iyon ng kabuuan, makipagsosyo sa Diyos upang matuklasan kung sino ang gusto Niyang makasama mo sa buhay.

Appearance

      Unahin ang iyong pangangalaga sa kaluluwa - ang estado ng iyong mga damdamin, pag-iisip at pagmamahal - tulad ng iyong pag-aalaga sa sarili. Panatilihing sakop ang iyong kaluluwa sa Kanyang katotohanan.

Plans

      Anyayahan ang Diyos sa bawat desisyon na gagawin mo tungkol sa iyong buhay. Higit pa rito, hayaan Siyang manguna.

Social Media

      Tandaan, ang mga app ay hindi totoo. Panatilihin ang malusog na mga hangganan at alamin kung oras na upang mag R.E.S.E.T.

Spiritual Growth Level 3 - Evening Devotion (Journaling 101)

Evening Devotion Guide

    Kapag naging bahagi na ng buhay mo ang morning devotion - ang mas madaling at mas mabilis na version ng devotion dadako naman tayo sa susunod na level. Dadagdagan natin ang pag-aaral mo ng Salita ng Diyos. Hindi lang sa umaga kundi dadagdadan natin sa gabi bago matulog.

    Muli, ang layunin namin ay matulungan ang bawat-isa sa paglago sa pananampalataya. (1 Pedro 2:2)

“Gaya ng sanggol, kayo’y manabik sa dalisay na gatas na espirituwal upang lumago kayo sa pananampalataya hanggang makamtan ninyo ang ganap na kaligtasan.”

    Nakikipag-ugnayan ang Diyos sa tao sa pamamagitan ng Kanyang Salita-ang Biblia. Ang Biblia ang pinakamataas na otoridad sa lahat ng may kinalaman sa pananampalataya at pamumuhay. Sa pamamagitan ng Kasulatan lalo mong makikilala ang Diyos, mauunawaan ang Kanyang mga ninanais para sa iyong buhay, at matutuklasan ang mga bagong katotohanan kaugnay ng pamumuhay para sa Kanya.

 

    Layunin din naming matulungan ang bawat-isa na manatili sa Salita ng Diyos at makita ang bunga nito sa inyong buhay ng tayo’y magkaroon lalo ng pananabik sa Salita ng Diyos. Narito ang ilang hakbang para mangyari ito:

1. Ito’y Basahin
Pahayag 1:3
"Pinagpala ang bumabasa ng aklat na ito, ang mga nakikinig sa propesiya nito, at tumutupad sa nasusulat dito! Sapagkat malapit na itong maganap."

2. Ito’y Pakinggan 
Roma 10:17
"Kaya't ang pananampalataya ay bunga ng pakikinig, at ang pakikinig naman ay bunga ng pangangaral tungkol kay Cristo."

3. Ito’y Pag-aralan 
Gawa 17:11
"Mas bukás ang isipan ng mga Judiong tagaroon kaysa sa mga Judiong taga-Tesalonica. May pananabik silang nakinig sa mga paliwanag ni Pablo, at sinaliksik nila araw-araw ang mga Kasulatan upang tingnan kung totoo nga ang sinasabi niya."

4. Ito’y Pagbulay-bulayan
Josue 1:8
"Huwag mong kaliligtaang basahin ang aklat ng kautusan. Pagbulay-bulayan mo iyon araw at gabi upang matupad mo ang lahat ng nakasaad doon. Sa ganoon, magiging masagana at matagumpay ang iyong pamumuhay."

5. Ito’y Isabuhay
Santiago 1:22
"Mamuhay kayo ayon sa salita ng Diyos. Kung ito'y pinapakinggan lamang ninyo ngunit hindi isinasagawa, dinadaya ninyo ang inyong sarili."

6. Ito’y Sauluhin 
Awit 119:11
"Ang banal mong kautusa'y sa puso ko iingatan, upang hindi magkasala laban sa iyo kailanman."

7. Ito’y Ituro o Ibahagi
Colosas 3:16
"Ang salita ni Cristo'y hayaan ninyong lubusang manatili sa inyong puso. Turuan ninyo at paalalahanan ang isa't isa nang may buong karunungan."

    Kapag ito ay pinagsumikapan nating gawin ito ang magiging bunga nito sa atin:

1. Ito’y Basahin - Kaalaman
2. Ito’y Pakinggan - Pananampalataya
3. Ito’y Pag-aralan - Manunuklas
4. Ito’y Pagbulay-bulayan - Kalakasan
5. Ito’y Isabuhay - Totoong Kristiyano
6. Ito’y Sauluhin - Kompiyansa
7. Ito’y Ituro o Ibahagi - Nagbubunga

    Papaano natin ito magagawa ang lahat ng ito sa ating devotion? Gagawin natin ito sa ating pang-gabi na devotion. Narito kung papaano ito gawin:

1. Magkaroon muli ng panibagong note book o kaya ay yung ginagamit nyo rin sa morning devotion.

2. Maghanap ng tahimik na lugar. Ilayo ang sarili sa mga maaaring makaistorbo gaya ng cellphone, tv, at iba pang gadget.

3. Gaya ng ginagawa sa iyong morning devotion ay manalangin muna. Humingi ng tulong sa Diyos sa pamamagitan ng panalangin.

3. Alisin ang mga masamang pag-iisip na biglang tumatakbo sa iyong isipan.

4. Basahin ng dalawa o higit pa ang talatang pag-aaralan. (Ito’y Basahin - Kaalaman).

a. Maaari kang gumamit ng daily bread pagkatapos ay kunin mo lamang ang daily read passage at ito ang iyong pagbulay-bulayan.

b. Maaari mo ding gamitin ang ibibigay na mga talata ng inyong iglesya o pastor o gumamit ng sarili mong paghati sa mga talata.

c. Pwede mo rin i-download at gamitin ito - Daily Devotion [Download PDF]

5. Basahin ang mga talata na naririnig ng iyong mga tenga. (Ito’y Pakinggan – Pananampalataya).

6. Simulan ang pagtuklas sa mga talatang binasa (Ito’y Aralin - Manunuklas). Gamitin ang U.Pa.Ka.Ha.Kat. na mga tanong sa pagtuklas:

a. Utos
May nakita kabang utos na pwedeng ariin? May mga utos na hindi pwedeng ariin.

Halimbawa:
- Nabasa mo ang, Genesis 6:14 - ito ba ay maaari mong angkinin? Hindi!
- Nabasa mo ang, Josue 1:8 - ito ba ay maaari mong angkinin? Oo!

b. Pangako: May nakita kabang pangakong pwedeng ariin? Katulad din sa Utos may mga pangakong mababasa ka na hindi pwedeng ariin at mga pangakong pwedeng ariin kaya mag-ingat.

c. Kasalanan: May kasalanan ka bang nakitang hindi dapat tularan?

d. Halimbawa: May halimbawa kabang nakitang dapat tularan?

e. Katotohanan: Hatiin sa dalawa

- Katotohanan sa tao: Katotohanang nakita tungkol sa tao

- Katotohahanan sa Diyos: Katotohanang nakita tungkol sa Diyos. Sa mga katotohanan sa Diyos na nakita ilagay kung  anong persona ito: Ama, Anak, at Espiritu Santo.

> Ilagay kung saang talata nakita. Gamitin ang (tal. #) sa unahan ng pangungusap.
> Kung wala kang makita na sagot sa tanong ay hayaan mo nalang at laktawan at huwag na isulat.

7. Pagkatapos ng pagtuklas muling manalangin. Manalangin sa kung anong talata ang may dalang mensahe ang Diyos sayo (Rhema).

8. Ilagay kung anong talata ang may dalang personal na mensahe sayo. Ilagay ito sa,"Talatang may dalang mensahe sayo."

9. Sunod ay sagutin ang tanong na, "Maging personal ang tekstong may dalang mensahe sayo" - (Ito’y pagbulay-bulayan –  Kalakasan).

- Simulan ang sagot sa, "Sa biyaya ng Diyos, naniniwala ako na..."

10. Sunod naman na sasagutin ay ang tanong na, "Maging praktikal ang teksto." - (Ito’y Isabuhay - Totoong Kristiyano).

- Simulan ang sagot sa, "Sa biyaya ng Diyos, tinatanggap ko na..."

11. Mag saulo ng kahit isang talata mula sa debosyon - isa sa isang linggo. At ito ay isasaulo sa inyong maliit na grupo. - (Ito’y Isaulo – Kompiyansa).

13. Tapusin ang devotion sa panalangin bilang tugon sa katotohanang tinuro sayo ng Diyos.

14. Ibahagi sa inyong mga small group ang inyong mga na debosyon. - (Ito’y Ituro o Ibahagi - Nagbubunga).

15. Mag lagay din ng tatlong pasasalamat mo sa Diyos sa bawat-araw.

16. Huwag kang panghinaan ng loob kapag may nakaligtaan kang araw sa pagbabasa.

17. Mag karoon ng mga magdidisipulong aalalay at magpapaalala sayo. (Accountability

Partner/Discipler-Coach/Mentor).

18. Kung meron kang hindi maunawaan o tanong lumapit ka sa iyong coach o nag didisipulo sayo o sa inyong pastor.


    Narito ang halimbawa kung papaano ito gamitin - gamit ang S.O.A.P. pattern. Pwede mo ding idownload ang pattern na ito: [Download printable pattern]

Scripture: Efeso 4:1-6
Date: January 01, 2022 (Saturday)

Observation: UPaKaHaKat

Utos: (tal.1) Mamuhay gaya ng nararapat sa mga tinawag ng Diyos.
(tal.2) magpakumbaba, mahinahon at matiyaga. Magmahalan at magpasensya sa isa’t isa.
(tal.3) Sikaping manatili ang pagkakaisa.

Katotohanan sa Tao: (tal.3) Ang mga mananampalataya ay may pagkakaisa at kapayapaang kaloob ng Espiritu.
(tal.4) Ang Kanyang tinawag ay may iisang katawan at iisang Espiritu at iisang pag-asa.
(tal.5) May-iisang Panginoon, iisang pananampalataya at iisang bautismo,
(tal.6) may iisang Diyos at Ama.

Katotohanan sa Diyos: (tal.6)nag iisang Diyos at Ama ng mga mananampalataya. Higit sa lahat, kumikilos at nananatili sa lahat.

Application:
Talatang may dalang mensahe sayo: Talata 1
Maging personal ang tekstong may dalang mensahe sayo: 
Sa biyaya ng Diyos, naniniwala ako na bilang mga tinawag ng Diyos dapat akong mamuhay ayon sa nararapat.

Maging Praktikal ang Teksto:
Sa biyaya ng Diyos, tinatanggap ko bilang tinawag ng Diyos na mamhuhay ako ayon sa nararapat – pamumuhay na tulad ni Jesus.

Prayer:
Ama, salamat po sa Iyong mga paalala kung papaano ako dapat mamuhay gaya ng nararapat sa mga tinawag Mo. Ama, tulungan Mo po ako na ito’y maipamuhay sa tulong at biyaya Mo. Sa pangalan ni Jesus. Amen.

Thanksgiving:
Salamat sa Diyos sa...
1. ligtas at masayang salubong namin ng bagong tao.
2. masayang reunion naming magpipinsan.
3. pagkakataong maibahagi ko sa mga pinsan ko ang Magandang Balita.

Spiritual Growth Level 2 - Morning Devotion (Journaling 101)

Morning Devotion Guide

    Ang layunin natin ay patuloy tayong lumago sa ating espirituwal na buhay. Kaya hindi natatapos sa pagbabasa lamang ng Biblia ang gagawin mo ngayon. Kapag natapos mo na ang dalawang buwan na pagbabasa lamang ng Biblia upang makabuo ng bagong habit ay dadagdagan natin ang gagawin mo. Gagawin mo na ang pagbubulay-bulay at  pagsusulat (pag journal) mula sa mga talatang nabasa. Itataas natin ang level mo sa iyong personal na oras mo sa Panginoon. 

    Minumungkahi naming bumili ka ng iyong notebook at ballpen nagagamitin sa pag-jo-journal. Tuwing umaga mo ito gagawin. Ito ay dinesenyo sa maikling oras lamang dahil karamihan ay may trabaho o pasok sa school na mag mo-morning devotion. Sa harap ng notebook ay isulat ang, "Talaan ng mga tanging kaisipan buhat sa pagbabasa ng Biblia." Narito ang gabay sa pagsusulat:

1. Manalangin

    Sa pagsisimula ay manalangin at humingi ng karunungan at gabay sa Panginoon. Ipanalangin na buksan ng Banal na Espiritu ang iyong puso sa mga katotohanan ng Kanyang Salita na may dalang personal na mensahe sayo. Ito ang tinatawag nating "Rhema" (Greek World) - "Tinig ng Diyos."

2. Sa pagbabasa, isulat kung anong talata ang may dalang personal na mensahe sayo (Rhema).

    Gaya ng iyong nakaugalian ay magbabasa ka ng isa o higit pang kapitulo sa Biblia. Pagkatapos ay isusulat mo kung saang talata ka nakakita ng personal na mensahe sayo ng Diyos.

3. Isulat ang talatang nakalagay.

4. Ilagay kung bakit ito ang may dalang personal na mensahe sayo.

    Simulan mo ang pagsusulat sa pangungusap na, "Sa biyaya ng Diyos, ..." Laging gamitin ang panghalip (pronoun) na, "ako, ko, sa akin" dahil ito ay personal na mensahe sa iyo, lalo na gapag ito ay binabahagi mo na sa iba. Iwasan na parang nagp-preach ka sa kanila.

5. Maaari mo itong ibahagi sa iba o sa iyong small group o i-post sa iyong mga social media account gamit ang  #BibleReadingTruthEncounter (huwag lagyan ng space).

    Narito ang pattern at halimbawa kung paano ito gawin. I-download din ang pattern dito kung gusto itong i-print: [Download Printable Pattern] [Download the Guide]


Petsa: January 01, 2022 (Saturday)
Mga binasa ko ngayon: Juan 1
Talatang may dalang personal na mensahe sa akin: Talata 13
Isulat ang talata: "Sila nga ay naging mga anak ng Diyos, hindi dahil sa isinilang sila ayon sa kalikasan o sa kagustuhan o kagagawan ng tao kundi ang pagiging anak nila ay dahil sa kalooban ng Diyos."
Anong dalang personal na mensahe nito sa akin: Sa biyaya ng Diyos, nagpaalala ito sa akin ng biyaya ng Diyos na patuloy na nagbibigay sa akin ng pagnanais na higit pang paglingkuran ang Diyos.


    Sikaping gawin muli ito araw-araw sa loob ng dalawang buwan bago gawin ang susunod na level ng paglago. 

Spiritual Growth Level 1 - Bible Reading Chart For New Believers

[Download Printable Pamphlet]

Bible Reading Chart
FOR NEW BELIEVERS

    Bilang isang bagong mananampalataya, maaaring marami kang tanong patungkol sa bagong buhay na nakay Kristo. Ang isang magandang paraan para lumago bilang Kristiano ay sa pamamagitan ng pagbabasa ng Salita ng Diyos - Ang Biblia. Habang may mga taong nagsasabi na napakahirap maunawaan ang Biblia, makakaasa tayo na ang Banal na Espiritu ang gagabay at tutulong sa atin habang tayo’y natututo at lumalago sa pagbabasa ng Kanyang Salita.

Narito ang ilang tulong sayo sa pagbabasa ng Biblia:

·         Maghanap ng tahimik na lugar
·         Humingi ng tulong sa Diyos
·         Alisin ang mga maaaring makasagabal
·         Alisin ang mga masamang pag-iisip na biglang tumatakbo sa iyong pag-iisip
·         Huwag kang panghinaan ng loob kapag may nakaligtaan kang araw sa pagbabasa
·         Maging matiyaga at mag patuloy
·         Mag karoon ng magdidisipulong aalalay at magpapaalala sayo


    Importante na basahin ng buo ang Biblia pero magandang magsimula sa bahaging may mga ituturo sayong mga mahalaga patungkol sa iyong bagong buhay na nakay Kristo. Itong pamphlet ay naglalaman ng iskedyul ng pagbabasa na mag tatagal ng dalawang buwan para matapos. Ayon sa pag-aaral ito ay sapat na napanahon para makabuo ng bagong habit. Maging Malaya ka na basahin ito ng mga kapitulo sa sarili mong bilis kung kinakailangan. Kapag na tapos mo na dapat maging susunod na layunin mo ay ang matapos ang buong Biblia. Sa ilalim mababasa mo ang maikling paliwanag sa mga librong iyong unang babasahin. 

Ang Magandang Balita ayon kay Juan
Isinulat para tumibay ang ating pananampalataya sa ating Panginoong Jesus. (Juan 20:30-31) 

Unang Sulat ni Juan
Isinulat para mag karoon ng katiyakan sa kaligtasan. (1 Juan 5:13) 

Awit Kaptulo 119
Ang pinakamagandang kapitulo sa Biblia patungkol sa pagmamahal sa Salita ng Diyos.

1 Tesalonica
Isinulat sa mga bagong mananampalataya para aliwin sila sa kanilang “kapighatian” at ipaalala sa kanila ang ikalawang pagbabalik ni Jesus. (1 Tesalonica 4:13-18) 

Genesis
Ang simula ng lahat ng bagay (paglikha, kasalanan, pagtubos, ang mga Judio, atbp.) at kung paano unang nagpahayag ang Diyos ng Kanyang Sarili sa sangkatauhan. Ito ang pundasyon ng Biblia.

A       Araw     √

1		Juan 1
2		Juan 2-3
3		Juan 4
4		Juan 5
5		Juan 6
6		Juan 7
7		Juan 8
8		Juan 9-10
9		Juan 11
10		Juan 12
11		Juan 13
12		Juan 14-15
13		Juan 16-17
14		Juan 18
15		Juan 19
16		Juan 20
17		Juan 21
18		1 Juan 1-2
19		1 Juan 3-5
20		Awit 119:1-72
21		Awit 119 73-129
22		Awit 119:130-176
23		1 Tesalonica 1-3
24		1 Tesalonica 4-5
25		Genesis 1
26		Genesis 2-3
27		Genesis 4-5
28		Genesis 6-7
29		Genesis 8-9
30		Genesis 10-11

31		Genesis 12-13
32		Genesis 14-15
33		Genesis 16-17
34		Genesis 18
35		Genesis 19
36		Genesis 20-21
37		Genesis 22-23
38		Genesis 24
39		Genesis 25
40		Genesis 26
41		Genesis 27
42		Genesis 28-29
43		Genesis 30
44		Genesis 31
45		Genesis 32-33
46		Genesis 34-35
47		Genesis 36
48		Genesis 37
49		Genesis 38-39
50		Genesis 40
51		Genesis 41
52		Genesis 42
53		Genesis 43
54		Genesis 44
55		Genesis 45
56		Genesis 46
57		Genesis 47
58		Genesis 48
59		Genesis 49
60		Genesis 50

    Pagkatapos ito mabasa ay itutuloy mo na ang pagbabasa sa kasunod na aklat ng Genesis - ang aklat ng Exodo, at itutuloy-tuloy mo na hanggang sa mabasa mo ang buong Biblia. I-download ang susunod na Bible Reading Chart.

[Download Bible Reading Chart]