Ano ang daan tungo sa Kaligtasan?

Tanong: 

Ano ang daan tungo sa Kaligtasan?

Sagot:

            Si Hesu Kristo ang tanging “daan” tungo sa kaligtasan! “Sapagka't sa biyaya kayo'y nangaligtas sa pamamagitan ng pananampalataya; at ito'y hindi sa inyong sarili, ito'y kaloob ng Diyos; Hindi sa pamamagitan ng mga gawa, upang ang sinoman ay huwag magmapuri” (Efeso 2.8-9). “..datapuwa't ang kaloob na walang bayad ng Diyos ay buhay na walang hanggan kay Cristo Jesus na Panginoon natin” (Roma 6.23).

            Ano ang pinagdadaanan mo ngayon sa buhay? Ikaw ba ay dumadaan sa pagkakasala, kalituhan, kaguluhan, kahirapan, kalungkutan, sakit, kapaguran, galit at kawalan ng pag-ibig o kawalang kabuluhan? Sadyang mahirap ang buhay! Si Satanas at ang kasalanan ang dahilan! Napapagod ka na ba sa pakikipag-laban sa tao at sa iyong mga problema? Si Hesus ang daan! Iniibig ka Niya! Si Hesus ang tanging tao at Panginoon na nararapat sundin! Muli ngang nagsalita sa kanila si Hesus, na sinasabi, “Ako ang ilaw ng sanlibutan; ang sumusunod sa Akin ay hindi lalakad sa kadiliman, kundi magkakaroon ng ilaw ng kabuhayan” (Juan 8.12).

            Sinabi sa kanya ni Hesus, “Ako ang daan, at ang katotohanan, at ang buhay: sinoman ay di makaparoroon sa Ama, kundi sa pamamagitan ko” (Juan 14.6). “Sapagka't ang lahat ay nangagkasala nga, at hindi nangakaabot sa kaluwalhatian ng Diyos” (Roma 3.23). “Sapagka't ang kabayaran ng kasalanan ay kamatayan; datapuwa't ang kaloob na walang bayad ng Diyos ay buhay na walang hanggan kay Cristo Hesus na Panginoon natin” (Roma 6.23). Namatay si Hesus sa krus dahil sa parusang tayo ang dapat dumanas. Ang pagkamatay ni Hesus ang naging daan para sa kapatawaran ng lahat ng tao (1 Juan 2.2; 2 Corinto 5.21). Ginapi Nya ang kasalanan at kamatayan pagkatapos na mamatay sa krus at Siya'y muling nabuhay (1 Corinto 15:1-28). “Na ipinahayag na Anak ng Diyos na may kapangyarihan ayon sa espiritu ng kabanalan, sa pamamagitan ng pagkabuhay na magmuli ng mga patay, sa makatuwid baga'y si Hesu Kristo na Panginoon natin” (Roma 4.1).

            Nais mo bang magkaroon o makaranas ng higit pang kapayapaan, kagalakan, kaligayahan, pag-ibig, kapanatagan at katagumpayan? Iniaalok ni Hesus ang isang relasyon na magbibigay sa iyo ng lahat ng ito! Tanging sa pamamagitan lamang ni Hesus makararanas ang tao ng kapatawaran, pagmamahal, kapayapaan at kagalakan na nagmumula sa Panginoon (Juan 14.6; Gawa 4.12). Ang personal na relasyon sa Anak ng Diyos ang magbibigay sa iyo ng kaligtasan at buhay na walang hanggan. Ang buhay na na kay Hesus ang tamang buhay para sa iyo! Kailangan mo Siyang tanggapin upang ika'y maging anak ng Diyos. Kailangan mo ang buong pananampalataya at pagtitiwala sa Kanya (Mateo 22.37, 39). Subalit hindi lahat ay maliligtas, tanging ang mga nagmamahal lamang kay Hesus ang maliligtas at mapupunta sa langit pagkatapos na sila ay mamatay. Ang ating kaligtasan ay pwedeng matiyak dahil sa Kanyang ginawa para sa atin at sa patuloy Nyang ginagawa sa pamamagitan ng Espiritu Santo.”Sapagka't gayon na lamang ang pagsinta ng Diyos sa sanlibutan, na ibinigay niya ang kanyang bugtong na Anak, upang ang sinomang sa kaniya'y sumampalataya ay huwag mapahamak, kundi magkaroon ng buhay na walang hanggan” (Juan 3.16).

            Kung nais mong ilagak ang iyong pananampalataya kay Hesu Kristo bilang iyong Panginoon at Tagapagligtas at tumanggap ng buhay na walang hanggan mula sa Diyos, narito ang isang panalangin na maaari mong pagbatayan. Ang panalanging ito ay isang paraan upang ipahayag sa Diyos Ama ang iyong pananampalataya sa Kanyang Anak at pasalamatan Siya sa regalo Niyang kapatawaran at buhay na walang hanggan. Tandaan mo na walang panalangin ang makapagliligtas sa iyo kundi ang Diyos lamang sa pamamagitan ng Kanyang Banal na Espiritu:

“Ama sa kalangitan, naniniwala ako sa inyong Anak na si Hesu Kristo, na Siya ang tanging daan upang magkaroon ako ng buhay na walang hanggan. Inaamin kong nagkasala ako laban sa Iyo at nararapat lamang na ako'y Iyong parusahan. Nagsisisi ako sa lahat ng aking mga nagawang kasalanan laban sa Iyo. Nalaman ko at nagpapasalamat ako kay Hesus na aking Tagapagligtas sa pag-ako ng parusang nararapat para sa akin. Dahil kay Hesus binabago ko ang aking pag-iisip tungkol sa paggawa ng kasalanan at hinihiling ko ang iyong tulong upang mapaglabanan ang pagnanasang magkasala muli. Salamat sa iyong kahanga-hangang pangako na buhay na walang hanggan. Tatalikdan ko ang aking mga kasalanan at maglilingkod kay Hesus at magtitiwalang Siya ang babago sa aking pagkatao at magliligtas sa kapahamakan. Sa pangalan ni Hesus, Amen."

(Mula sa gotquestion.org)

Daan sa Kaligtasan (Part 4 of 4) - ANG KAPALIT NG PAGSUNOD KAY JESUS SA DAAN

Daan sa Kaligtasan (Part 4 of 4)
ANG KAPALIT NG PAGSUNOD KAY JESUS SA DAAN

Ang pagnanais na maligtas ay isang desisyon na nais mong maging alagad ni Jesus. At nawa sa puntong ito ng ating pag-aaral ay nakagawa kana ng desisyon magsisi sa iyong mga kasalanan at sumampalataya kay Jesus bilang iyong Panginoon at Taga-Pagligtas. Sa huling bahagi ng pag-aaral na ito ay titignan natin ng mas malalim ang kahulugan ng desisyong sumampalataya kay Jesus. Pag-aaralan natin kung ano ba ang inaasahan sa mga taong gustong maligtas sa tiyak na kapahamakan sa impyerno. Kaya ang pamagat ng ating pag-aaralan ay, “Ang Kapalit ng Pagsunod Kay Jesus sa Daan.”

Basahin ang Lucas 14:25-33

Lucas 14:25-33
25 Sumama kay Jesus ang napakaraming tao; humarap Siya sa kanila at Kanyang sinabi, 26 “Hindi maaaring maging alagad Ko ang sinumang umiibig sa kanyang ama at ina, asawa at mga anak, mga kapatid, at maging sa sarili niyang buhay nang higit sa Akin. 27 Ang ayaw magpasan ng sarili niyang krus at sumunod sa Akin ay hindi maaaring maging alagad Ko. 28 “Kung ang isa sa inyo’y nagbabalak na magtayo ng tore, hindi ba siya uupo muna upang magplano at kuwentahin kung magkano ang magagastos niya upang matiyak kung may sapat siyang pera para maipatapos ang kanyang ipapatayo? 29 Baka matapos mailagay ang mga pundasyon ay hindi naman mayari ang tore. Siya’y kukutyain lamang ng lahat ng makakakita niyon. 30 Sasabihin nila, ‘Anong taong ito’y nagsimulang magtayo ngunit hindi naman naipatapos.’ 31 “O sinong hari na makikipagdigma sa kapwa hari ang hindi muna mauupo upang pag-aralang mabuti kung ang sampung libong kawal niya ay maisasagupa sa kalaban na may dalawangpung libong kawal? 32 At kung hindi niya kaya, malayo pa ang kalaban ay magsusugo na siya ng mga kinatawan upang makipagkasundo. 33 Gayundin naman, hindi maaaring maging alagad Ko ang sinuman kung hindi niya tatalikuran ang lahat sa kanyang buhay.

Upang matulungan tayo na mas makagawa ng desisyong sumampalataya kay Jesus ay pag-aralan natin ang: Kapalit ng pagsunod; Kapalit ng hindi pinag-isipang desisyon; at kapalit ng hindi pagsunod.

I. KAPALIT NG PAGSUNOD (mtal. 25-27)

“25 Sumama kay Jesus ang napakaraming tao; humarap Siya sa kanila at Kanyang sinabi, 26 “Hindi maaaring maging alagad Ko ang sinumang umiibig sa kanyang ama at ina, asawa at mga anak, mga kapatid, at maging sa sarili niyang buhay nang higit sa Akin. 27 Ang ayaw magpasan ng sarili niyang krus at sumunod sa Akin ay hindi maaaring maging alagad Ko…”

A. Ang Panginoon ng iyong buhay.
Una, pag-aralan natin ang mga talatang 25-27 kung saan pinakita ni Jesus ang kapalit ng pagiging alagad. Sabi ni Jesus na, “Hindi maaaring maging alagad Ko…” ito’y nangangahulugan na hindi pwedeng maligtas ang isang tao kung hindi mo handang tanggapin ang magiging kapalit ng pagiging alagad ni Jesus. Ang pagiging ligtas ay ang pagiging alagad ni Jesus.

Pansinin din sa sinabi Niya ang, “hindi maaaring maging alagad Ko…” ibig sabihin nito na dapat mong kilalanin si Jesus na iyong Panginoon at Hari ng iyong buhay. Dapat mong tanggapin na Siya dapat ang masunod sa iyong buhay. Hindi mo lang Siya dapat tanggapin bilang iyong Taga-pagligtas kundi maging bilang iyong Panginoon.

B. Ang Higit sa iyong buhay.
Sinasabi sa talatang 26 na “hindi maaaring maging alagad ni Jesus ang sinumang umiibig sa kanyang pamilya at sa sarili.” Ito’y hindi nangangahulugan na lapastanganin mo ang iyong pamilya at pabayaan ang sarili, ito’y nangangahulugan na dapat nating mahalin si Jesus nang higit sa ating pamilya at sarili. Kailangang pahawakan natin sa Kanya ang lahat ng bahagi ng ating buhay.

Marami ngayon na ang ginagawang rason para hindi magawa ang mga pagbabasa ng Biblia, pagdadasal, pagdidisipulo, pag-adalo sa mga pagtitipon ay dahil sa kanilang mga anak o trabaho. Ang anak ay isang pagpapalang kaloob ng Diyos sa mga magulang. Awit 127:3, “Kaloob nga ni Yahweh itong ating mga anak, ang ganitong mga supling, pagpapalang mayro'ng galak.” At maging ang trabaho ay biyayang kaloob ng Diyos. Mangangaral 5:19, “Ganoon din ang dapat gawin ng lahat ng niloob ng Diyos na yumaman: tanggapin ang kanilang bahagi at pakinabangan ang bunga ng kanyang pinagpaguran sapagkat ito ay kaloob ng Diyos.” Tandaan natin na ito ay binigay ng Diyos para mas lalo tayong mapalapit sa Kanya at hindi para ilayo tayo nito sa Kanya dahil hindi nagbibigay ang Diyos sa atin ng mga bagay na maglalayo sa atin sa Kanya.

C. Ang modelo sa iyong buhay
“Ang ayaw magpasan ng sarili niyang krus at sumunod sa Akin ay hindi maaaring maging alagad Ko…” (tal. 27).

Hindi tayo hinahanapan ni Jesus nang higit sa Kanyang ibinigay sa atin. Tiniis Niya ang lahat ng paghihirap samantalang nasa lupa, at ibinigay ang Kanyang sarili upang mamatay sa krus para sa atin. Hindi rin ito nangangahulugan na dapat tayong literal na gumawa ng krus at pasanin ito at magpapako dito kapag mahal ng araw. Kaya nang sabihin Niyang, “Pasanin natin ang ating krus” (tal. 27), nais Niyang “mamatay tayo sa ating sarili - limutin at talikuran natin ang ating sarili (mga masasamang gawa) at ang sanlibutan (mga masamang gawa nito), at mabuhay na tulad Niya sa pagtitiis at paghihirap sa paglilingkod sa Diyos.”

Ang krus ay sumisimbulo sa:

a. Paghihirap
Maraming mga naging Kristiyano ang nakapagsabi nito, “Noong ako ay hindi pa mananampalataya ay hindi ganoon kahirap ang aking buhay, ngayong ako ay naging mananampalataya na eh naging mas mahirap ang aking buhay.” Ito ang mga tao na hindi nakakaunawa sa ano ba ang kapalit ng pagsunod kay Jesus. Ito ang mga tao na sumampalataya lang kay Jesus kasi gusto lang nila makapunta sa langit at ayaw gawing Panginoon si Jesus sa kanilang buhay at paglingkuran Siya. Hindi sila handang magtiis para kay Kristo.

Filipos 1:29
“Dahil ipinagkaloob Niya sa inyo, hindi lamang ang manalig sa Kanya, kundi ang magtiis din naman alang-alang kay Cristo.”

Santiago 1:2-4
“2 Mga kapatid, magalak kayo kapag kayo'y dumaranas ng iba't ibang uri ng pagsubok. 3 Dapat ninyong malaman na nagiging matatag ang inyong pananampalataya sa pamamagitan ng mga pagsubok. 4 At dapat kayong magpakatatag hanggang wakas upang kayo'y maging ganap at walang pagkukulang.”

b. Kamatayan
Ano ang kamatayan na tinutukoy dito?

1. Kamatayan sa sarili
Galacia 2:20-21

"Hindi na ako ang nabubuhay ngayon kundi si Cristo na ang nabubuhay sa akin. At habang ako'y nabubuhay pa sa katawang-lupa, mamumuhay ako sa pananalig sa Anak ng Diyos na umibig sa akin at naghandog ng kanyang buhay para sa akin. Hindi ko maaaring tanggihan ang kagandahang-loob ng Diyos. Kung ang tao'y mapapawalang-sala sa pamamagitan ng Kautusan, walang kabuluhan ang pagkamatay ni Cristo!"

Galacia 5:24-25
“24 At ipinako na sa krus ng mga nakipag-isa kay Cristo Jesus ang kanilang laman at ang masasamang hilig nito. 25 Kung binigyan tayo ng buhay ng Espiritu, mamuhay rin tayo ayon sa Espiritu.”

Hindi na ang mga gusto natin ang masusunod. Lahat ng pangarap natin, plano, layunin sa buhay, nais at plano ay dapat naka-angkla at naka sentro kay Jesus.

2. Kamatayan sa lumang pagkatao

Efeso 4:22-24
22 Iwan na ninyo ang dating pamumuhay. Hubarin na ninyo ang inyong dating pagkatao na nasisira dahil sa masasamang pagnanasa. 23 Magbago na kayo ng diwa at pag-iisip; 24 at ang dapat ninyong isuot ay ang bagong pagkatao na nilikhang kalarawan ng Diyos, at nahahayag sa matuwid at banal na pamumuhay ayon sa katotohanan.

Colosas 3:10
“Isinuot ninyo ang bagong pagkatao na patuloy na nababago at nagiging kalarawan ng Diyos na lumikha sa inyo, upang lalo ninyo siyang makilala.”

2 Corinto5:17
“Kaya't kung nakipag-isa na kay Cristo ang isang tao, isa na siyang bagong nilalang. Wala na ang dati niyang pagkatao, sa halip, ito'y napalitan na ng bago.”

3. Kamatayan sa kasalanan
Hindi na tayo alipin ng kasalanan. Hindi tayo namumuhay ng tuluy-tuloy na pamumuhay sa kasalanan.

1 Pedro 2:24
“Sa Kanyang pagkamatay sa krus, pinasan Niya ang ating mga kasalanan upang tayo'y mamatay na sa kasalanan at mamuhay nang ayon sa kalooban ng Diyos. Sa pamamagitan ng Kanyang mga sugat, kayo'y pinagaling.”

Roma 6:1-6
“1 Ano ngayon ang sasabihin natin? Patuloy ba tayong magkakasala upang sumagana sa atin ang kagandahang-loob ng Diyos? 2 Hinding-hindi! Tayo'y patay na sa kasalanan, paano pa tayo mamumuhay sa pagkakasala? 3 Hindi ba ninyo alam na tayong lahat na nabautismuhan kay Cristo Jesus ay nabautismuhan sa Kanyang kamatayan? 4 Samakatuwid, tayo'y namatay na at nalibing na kasama Niya sa pamamagitan ng bautismo upang kung paanong binuhay muli si Cristo sa pamamagitan ng dakilang kapangyarihan ng Ama, tayo rin ay magkaroon ng panibagong buhay. 5 Sapagkat kung nakasama tayo ni Cristo sa isang kamatayang katulad ng Kanyang kamatayan, tiyak na tayo ay makakasama rin niya sa muling pagkabuhay na katulad ng kanyang muling pagkabuhay. 6 Alam natin na ang dati nating pagkatao ay naipako na sa krus kasama Niya, upang mamatay ang ating makasalanang pagkatao at nang hindi na tayo maalipin pa ng kasalanan.”

Kung hindi mo handang tanggihan ang iyong sarili, hindi ka maaaring maging isang Kristiyano. Dapat mong mahalin si Kristo nang higit pa sa iyong ina, tatay, at dapat mong mahalin siya nang higit pa sa iyong sariling buhay. Dapat ay handa kang mamatay para kay Kristo. Ito ay alinman sa ikaw ay alipin ng kasalanan o ikaw ay isang alipin ni Kristo.

Dapat mong tanggihan ang iyong sarili at pasanin ang krus araw-araw. Dapat kang magtiwala sa Panginoon sa pinakamahirap na sitwasyon. Dapat mong disiplinahin ang iyong sarili at tumanggi sa mundo. Ang iyong buhay ay dapat laging patungkol kay Kristo.

Ang isang taong gustong panatilihin ang kanyang buhay at patuloy na namumuhay ng kasalanan ay hindi isang Kristiyano. Ang taong iyon ay hindi bagong nilikha at isa lamang sinungaling.

Dadaan tayo sa mga pagsubok, ngunit ang mga pagsubok ang nagpapatatag sa atin kay Kristo. Ang ating buhay ay hindi para sa atin, ito ay palaging para kay Kristo. Namatay Siya para sa atin kahit na hindi tayo karapat-dapat. Lahat ng mayroon tayo ay para kay Kristo. Lahat ng mabuti ay galing sa Kanya at ang masama ay sa atin.

II. KAPALIT NG HINDI PINAG-ISIPANG DESISYON (mtal. 28-30)

28 “Kung ang isa sa inyo’y nagbabalak na magtayo ng tore, hindi ba siya uupo muna upang magplano at kuwentahin kung magkano ang magagastos niya upang matiyak kung may sapat siyang pera para maipatapos ang kanyang ipapatayo? 29 Baka matapos mailagay ang mga pundasyon ay hindi naman mayari ang tore. Siya’y kukutyain lamang ng lahat ng makakakita niyon. 30 Sasabihin nila, ‘Anong taong ito’y nagsimulang magtayo ngunit hindi naman naipatapos.’”

Bakit kaya ginawang ilustrayon ni Jesus ang toreng hindi tapos? Dahil ito ay tumutukoy sa mga taong nabigong magpatuloy sa Panginoon ang mga taong nagsabing sila ay mananampalataya. Ang tanong ngayon ay bakit sila nabigong magpatuloy?

Maraming tao ang naaakit kay Kristo dahil gusto lamang nilang mapunta sa langit. Ngunit hindi sila handang mag-sakripisyo. Madali silang nagdesisyon upang sumunod kay Jesus, at marahil ay nalalaman nila ang ilang bagay na magiging kapalit nito, ngunit hindi naisip ang kapalit nitong panghabang-buhay.

Ito’y isang babala sa mga taong nagnanais na magdesisyong magsisi sa kanilang kasalanan at sumampalataya kay Jesus. Tulad sa pag-aasawa marami ang naghihiwalay dahil marami sa kanila na nagdesisyong mag-asawa ngunit hindi pinag-isipan ang magiging kapalit na buhay may asawa. Ganun din sa maraming taong nais sumunod kay Jesus na hindi pinag-isipan at inalam kung ano ang magiging kapalit nito sa kanyang buhay.

Minsang may binahaginan ako ng Magandang Balita na isang security guard ng isang private school na pinagtatrabahyuan ng aking asawa. Matapos kong maituro rito ang magiging kapalit ng pagiging alagad ni Jesus, tinanong ko ang lalake kung gusto niyang sumampalataya kay Kristo at maging kanyang Panginoon at Taga-pagligtas ito. Nagulat ako ng sinabi nito na “hindi niya gusto isuko ang kanyang buhay kay Jesus.” Nalaman ni ko na ang dahilan ay dahil meron itong kabit habang ang asawa nito ay nagtatrabaho sa ibang bansa at nauubos ang padala ng asawa niya sa sabong. Hindi siya handang isuko ito sa Panginoon. Mas gusto nyang maghari si Satanas sa kanyang buhay kaysa kay Jesus. Iyan ang nakakapagtaka kung bakit marami ang mas pinipili ang pagharian ni Satanas kaysa ni Jesus. Bakit mas marami ang pinilipi ang impyerno kaysa sa langit. May tanong na, “bakit dinala ng Diyos ang tao sa impyerno,” pero ang tamang tanong ay, “bakit mas pinipili ng tao ang impyerno kaysa langit.”

III. KAPALIT NG HINDI PAGSUNOD (mtal. 31-33)

31 “O sinong hari na makikipagdigma sa kapwa hari ang hindi muna mauupo upang pag-aralang mabuti kung ang sampung libong kawal niya ay maisasagupa sa kalaban na may dalawangpung libong kawal? 32 At kung hindi niya kaya, malayo pa ang kalaban ay magsusugo na siya ng mga kinatawan upang makipagkasundo. 33 Gayundin naman, hindi maaaring maging alagad Ko ang sinuman kung hindi niya tatalikuran ang lahat sa kanyang buhay.”

Dalawa lang ang desisyong dapat gawin ng haring may 10,000 kawal laban sa hari na may 20,000 kawal, ang lumaban o ang sumuko. Sino ang inilalarawan ng dalawang haring ito? Tayo ang haring may 10,000 kawal at ang Diyos naman ang haring may 20,000 kawal. Pansinin sa ilustrasyon na ang tanging magagawa ng haring may 10,000 kawal ay sumuko. Sapagkat lulusubin siya ng ibang hari kung hindi siya susuko. Tulad nito, kakalabanin din tayo ng Diyos kung hindi tayo susuko sa Kanya.

Ngunit bakit tayo kakalabanin ng Diyos kung hindi tayo susuko sa Kanya? Sapagkat alam natin ang lahat na mga sinasabi at pamantayan na ipinahayag ni Jesu-Kristo, ang makapangyarihang Diyos. Maaari nating tanggapin o tanggihan ang mga ito. Kung tatanggapin natin, tayo’y nasa panig ng Diyos at nakikipaglaban kay Satanas. Kung tatanggihan naman natin, tayo’y nasa panig ni Satanas at nakikipaglaban sa Diyos. Hindi pwedeng wala kang pinapanigan. Hindi pwede na balewalain ang Diyos at gawin ang gusto nating gawin. Kung wala ang Diyos, tayo’y matutukso, maiimpluwensyahan, at sa dakong huli ay maaalipin ni Satanas. Isipin na lamang ninyo kung paanong napakadali nating mag-isip, magsalita at gumawa ng masama. Aminin man natin o hindi, nasa ilalim tayo ng kapangyarihan ni Satanas. Ang tanging solusyon dito ay makipagkasundo tayo sa Diyos. Kailangang pumanig tayo sa Kanya ayon sa Kanyang pamantayan, at talikdan ang lahat (tal.33). Sa gayo’y ililigtas Niya tayo sa pagkaalipin kay Satanas at pagkalooban tayo ng tunay na kalayaan, kapayapaan, kagalakan at pag-ibig!

Puwede kaya na ang isang tunay na kristiyano ay maging mananampalataya lamang at hindi isang alagad ni Kristo? Hindi pwede. Ang isang taong hindi handang humarap sa magiging kapalit ng pagiging alagad, at gusto’y maging “isang mananampalataya” lamang (para makapunta siya sa langit) tulad sa isa sa napakaraming tao sa Lucas 14:25. Nais lamang ng mga taong ito ang isang bagay mula kay Jesus ngunit ayaw nilang sumunod sa Kanya.

Si Jesus bilang Tagapagligtas at si Jesus bilang Panginoon ay tulad sa dalawang mukha ng isang barya. Hindi maaring isang mukha lamang, kailangan ay dalawa. Sinasabi sa Roma10:9 na, “Kung ipahayag ng iyong labi na si Jesus ay Panignoon… maliligtas ka.” Sa 1 Corinto 6:19, 20 ay sinasabi, “Ang iyong katawan ay hindi talagang inyo… binili Niya kayo sa malaking halaga.” Ang dakilang utos sa atin ay “Kaya, humayo kayo at gawin ninyong alagad Ko ang lahat ng bansa” (Mateo 28:19)

Kung titignan ay mukang napakataas ng pamantayan ng pagiging alagad ni Jesus. At marami sa ating ang napapa-isip kung maaabot ba natin ito. Hindi ibig sabihin ng pagiging alagad ay pagiging perpekto. Si Simon Pedro ay isang alagad pero ipinagkaila niya ang Panginoong Jesus nang tatlong beses. Ngunit nagsisi siya pagkatapos. Ang isang alagad ay isang tao na nagsuko nang kanyang buhay kay Jesus at nagsisikap na masunod sa Kanya.

Konklusyon:
Ngayong alam mo na ang magiging kapalit ng pagsunod kay Jesus at kung ano ang mangyayari kung hindi ninyo Siya susundin, ano ngayon ang inyong desisyon?

Nais mo bang maligtas sa tiyak na kapahamakan sa impyerno? Nais ba mo bang isuko ang iyong buhay sa Kanya at hayaang Siya ang maghari-masunod sa iyong buhay? Nais mo bang magsisi at talikuran ang iyong maduming pamumuhay at nagnanais na sumampalataya kay Jesus? Tulad ng sinabi ni Jesus mainam na umupo ka muna at muli mong pagbulay-bulayan ang mga katotohanang pinakita sayo ng Diyos sa pag-aaral nating ito. At gumawa ng siguradong desisyon dahil ito’y tunay mong naunawaa. Minumungkahi kong muli mong balikan ang mga napag-aralan at mas unawain at kung tiyak na sa iyong puso na nais mong magsisi at talikuran ang iyong maruming pamumuhay at ikaw ay sumasampalataya kay Jesus, kausapin mo ang Diyos sa pamamagitan ng panalangin at ilahad mo ang laman ng iyong puso base sa mga katotohanang iyong tinanggap. Ilahad mo kung ano ang desisyong nais mong gawin sa Kanya.

Kung ikaw ay nagdesisyong magsisi at sumampalataya kay Jesus bilang iyong Panginoon at taga-pagligtas, marapat lang na mas kilalanin mo pa si Jesus sa iyong buhay.

______________________________________________

PAG-ISIPAN:
1. Ano ang inaasahan ni Jesus sa mga gustong maging alagad Niya?
2. Bakit maraming taong nagsasabi na sila ay mananampakataya ang nabigong magpatuloy sa Panginoon?
3. Ano ang magiging kapalit ng hindi pagsuko kay Jesus?

PAGSASABUHAY:
1. Anong paghihirap ang handa mong tiisin ng dahil sa pagsunod m okay Kristo?
2. Ano ang mga bagay na nais mong alisin sa iyong buhay upang mas mag Hari si Jesus sa iyong buhay?

PANANALANGIN:
Ipanalangin ang pagsasabuhay na nagawa na tulungan tayo ng Diyos na maipamuhay ito.

 

 

Aralin sa Kaligtasan (Part 3 of 4) - ANG KASINUNGALINGAN AT ANG KATOTOHANAN SA DAAN

Daan sa Kaligtasan (Part 3 of 4)
ANG KASINUNGALINGAN AT ANG KATOTOHANAN SA DAAN


Sa krus, matagumpay na isinigaw ni Jesu-Kristo, “Naganap na!” (Juan 19:30) Ganap na ang kaligtasan. Natapos ni Kristo ang kinakailangang gawin para sa kaligtasan. Ngayon, inaalok ng Diyos ang ganap at sakdal na gawa ni Kristo bilang Kanyang kaloob sa atin. Inaalok Niya ang kaligtasan bilang Kanyang biyaya na matatanggap sa pamamagitan ng pananampalataya. Ngayon sa ating pag-aaral ay titignan natin ang pagsusumikap ng kaaway na baguhin ang Daan sa kaligtasan sa paglalagay ng mga kasinugalingan dito. Tignan natin ang ilang sa mga ito.

I. PANANAMPALATAYA LABAN SA GAWA

Marahil ay isa kayo o minsang naniwala na ang kaligtasan ay makakamit din sa pamamagitan ng mga gawa – paggawa ng mabuti at pagsunod sa mga utos ng Diyos. Isa sa mga pamilyar ngayon ay ang salitang, “minus o dadag points sa langit.” Ito ay dahil sa paniniwala ng marami na ang kaligtasan ay magiging posible sa performance mo, mas maraming ginawang mabuti mas maraming dagdag points at kapag mas maraming ginawang mali maraming bawas points para makapasok sa langit. Maraming mga politikong kurakot ang namimigay ng pera at tulong sa ibang mahihirap sa paniniwalang kahit na sila ay nagnakaw dahil sa dami ng kanilang ginawang kabutihan ay mataas ang tyansa nila sa langit. Naalala ko nang bata ako ay sinusulat ko sa notebook ko ang mali at tama kong ginawa para malaman ko kung mas lamang ang puntos ko papuntang langit. Kaya binabantayan ko ito palagi.

Maraming tao ang naniniwala na mapapatawad sila sa kanilang mga kasalanan sa pamamagitan ng paggawa ng mga mabubuting gawa, pero ano ba ang sinasabi ng Salita ng Diyos? Sabi sa Roma 3:19-20, “Alam natin na anumang sinasabi ng Kautusan ay sinasabi sa mga nasasakop nito upang walang maidahilan ang sinuman, at dahil dito'y mananagot ang lahat sa Diyos. Walang taong mapapawalang-sala sa paningin ng Diyos sa pamamagitan ng pagsunod sa Kautusan, dahil ang gawain ng Kautusan ay ang ipamukha sa tao na siya'y nagkasala.” Iyan ang layunin at tulong sa atin ng kautusan para makita at malaman natin ang hindi natin makita na napag-aralan natin noong una - na tayo ay makasalanan at kailangan natin ng Taga-pagligtas.

Bakit isinantabi ng Diyos ang paggawa ng mabuti para maligtas kundi sa pamamagitan ng pananampalataya lamang kay Jesus? Sabi sa Roma 3:27-28, “Kaya't ano ngayon ang ating maipagmamalaki? Wala! At bakit naman tayo magmamalaki? Dahil ba sa ating pagsunod sa Kautusan? Hindi! Kundi dahil sa ating pananampala-taya kay Kristo.Kung gayon, maliwanag na sa pama-magitan lamang ng pananampalataya mapapawalang-sala ang tao, at hindi sa pamamagitan ng pagtupad sa Kautusan.” Isinantabi ng Diyos ang pagpapatawad sa tao sa pamamagitan ng gawa dahil ayaw Niya na tayo ay makapagmalaki sa sarili nating gawa. Kasi kung iyon nga ang naging batayan pagdating ng mga tao sa langit ay magyayabangan sila sa kung bakit sila pinapasok sa langit. Ngunit alalahanin natin na isa sa dahilan kung bakit pinatapon si Lucifer sa impyerno ay dahil siya’y nagmalaki sa kanyang sarili sa langit.

II. KALOOB LABAN SA MGA GAWA

Bukod sa ayaw ng Diyos ang pagmamalaki sa langit kaya hindi sa pamamagitan ng gawa ang tao ay maligtas, isa pa sa dahilan kung bakit hindi pwede sa pamamagitan ng gawa ay dahil sa ang kaligtasan ay kaloob ng Diyos. Sabi sa Roma 6:23, “Sapagkat kamatayan ang kabayaran ng kasalanan, ngunit ang libreng kaloob ng Diyos ay buhay na walang hanggan, sa pamamagitan ni Kristo Jesus na ating Panginoon.” Malinaw na ang kaligtasan ay libreng kaloob ng Diyos. Ano ang ibig sabihin nito? Roma 4:4, “Ang ibinibigay sa taong gumagawa ay hindi itinuturing na kaloob, kundi kabayaran.” Sabi ni Pablo na kung ang kaligtasan ay sa pamamagitan ng sariling gawa natin ang kaligtasan ng tao ay magiging kabayaran ng Diyos at hindi matatawag na libreng kaloob. Nakay Jesu-Kristo ang kaloob ng Diyos na buhay na walang hanggan. Kaya ano ang dapat nating gawin upang matanggap ang kaloob na ito ng Diyos?

Juan 1:12 – “Subalit ang lahat ng tumanggap at sumampalataya sa Kanya ay binigyan Niya ng karapatang maging mga anak ng Diyos.”

1 Juan 5:11-12 – “At ito ang patotoo: ipinagkaloob sa atin ng Diyos ang buhay na walang hanggan at ito'y makakamtan natin sa pamamagitan ng Kanyang Anak. Ang sinumang pinapanahanan ng Anak ng Diyos ay mayroong buhay na walang hanggan, ngunit ang hindi pinapanahanan ng Anak ng Diyos ay hindi makakaranas ng buhay na walang hanggan.”

Muli malinaw na tanging sa pamamagitan lamang ng pananampalataya kay Jesus upang matanggap ng tao ang libreng kaloob ng Diyos na kaligtasan.

III. BIYAYA LABAN SA MGA GAWA

Ang libreng kaloob na ito ng Diyos ay inalok sa lahat ng tao, anoman ang iyong kalagayan, lahi, at kulay. Iyan ang sabi sa 1 Timoteo 2:4, “Ibig Niyang ang lahat ng tao ay maligtas at makaalam ng katotohanang ito.”  Dahil dito malinaw na ang kaligtasang matatanggap ng mga sasampalataya kay Jesus ay isang biyaya. Ano ang ibig sabihin ng biyaya? Ang biyaya ay pagpapala at kabutihang ibinigay na walang bayad ng Diyos sa mga hindi karapat-dapat. Kalakip ng biyayang ito ay ang gawin tayong matuwid sa harap ng Diyos sa pamamagitan ng Kanyang kagandahang-loob. Iyan ang sabi sa Tito 3:7, “Upang tayo'y gawing matuwid sa pamamagitan ng Kanyang kagandahang-loob, at tayo'y maging tagapagmana ayon sa ipinangakong buhay na walang hanggan.” Yamang ang kaligtasan ay batay sa biyaya at kagandahang-loob ng Diyos, ano ang huwag nating dapat isama rito? Roma 11:6, “At kung iyon ay dahil sa Kanyang kagandahang-loob, maliwanag na iyon ay hindi dahil sa gawa, sapagkat kung ang ginawa ng tao ang siyang batayan, hindi na iyon masasabing kagandahang-loob.” Kung pipilitin ng tao o ng isang sekta ng relihiyon na ang tao ay maliligtas sa pamamagitan ng mga gawa ng tao, winawalang kabuluhan nila ang kamatayan ni Jesus sa krus.

Galacia 2:21
“Hindi Ko maaaring tanggihan ang kagandahang-loob ng Diyos. Kung ang tao'y mapapawalang-sala sa pamamagitan ng Kautusan, walang kabuluhan ang pagkamatay ni Kristo!”

Galacia 5:2, 4
“… binabale-wala ninyo si Kristo. Kayong nagsisikap na maging matuwid sa pamamagitan ng pagtupad sa Kautusan, inihiwalay ninyo ang inyong sarili kay Kristo at tinanggihan ninyo ang kagandahang-loob ng Diyos.”

Ang buod ng ating pinag-aralan ay makikita natin sa Efeso 2:8-9, “Sapagkat dahil sa kagandahang-loob ng Diyos kayo ay naligtas sa pamamagitan ng pananampalataya; at ang kaligtasang ito'y kaloob ng Diyos at hindi sa pamamagitan ng inyong sarili; hindi ito bunga ng inyong mga gawa kaya't walang dapat ipagmalaki ang sinuman.”

Muli ang kaligtasan ay makakamit hindi sa pamamagitan ng gawa: paggawa ng mabuti, pagsunod sa kautusan, pag-anib sa isang relihiyon, pagpapabautismo, at anumang mga kulturang gawaing panrelihiyon.

Galacia 2:16
“Gayunman, alam naming ang tao'y pinapawalang-sala dahil sa pananampalataya kay Jesu-Kristo, at hindi dahil sa pagsunod sa Kautusan. Kaya't kami rin ay sumasampalataya kay Kristo Jesus upang mapawalang-sala sa pamamagitan ng pananampalataya sa Kanya, at hindi sa pamamagitan ng pagsunod sa Kautusan. Sapagkat ang tao'y hindi pinapawalang-sala dahil sa pagsunod sa Kautusan.”

PAGSISISI AT PANANAMPALATAYA

Ano ang tanging gawa para tayo’y maging matuwid sa harapan ng Diyos?

A. Minasan makikita natin na ang kaligtasan ay sa pamamagitan lang ng 

    pananampalataya:

Gawa 11:17
“Kung ibinigay nga sa kanila ng Diyos ang gayon ding kaloob na gaya naman ng Kaniyang ibinigay sa atin, nang tayo'y nagsisisampalataya sa Panginoong Jesu-Kristo, sino baga ako, na makahahadlang sa Diyos?”

Gawa 14:23
“At nang makapaglagay na sa kanila ng mga matanda sa bawa't iglesya, at nang makapanalanging may pag-aayuno, ay ipinagtagubilin sila sa Panginoong kanilang sinampalatayanan.”

Gawa 16:31
“At kanilang sinabi, Manampalataya ka sa Panginoong Jesus, at maliligtas ka, ikaw at ang iyong sangbahayan.”

B. Minsan makikita naman natin na ang kaligtasan ay sa pamamagitan 

    lang ng pagsisisi:

Gawa 2:38
“At sinabi sa kanila ni Pedro, Mangagsisi kayo, at mangagbautismo ang bawa't isa sa inyo sa pangalan ni Jesu-Kristo sa ikapagpapatawad ng inyong mga kasalanan; at tatanggapin ninyo ang kaloob ng Espiritu Santo.”

Gawa 3:19
“Kaya nga mangagsisi kayo, at mangagbalik-loob, upang mangapawi ang inyong mga kasalanan, upang kung magkagayon ay magsidating ang mga panahon ng kaginhawahang mula sa harapan ng Panginoon.”

Gawa 8:22
“Pagsisihan mo ang kasamaan mong ito at manalangain ka sa Panginoon, na nawa’y patawarin ka Niya sa iyong hangarin.”

Gawa 17:30
“Ang mga panahon ng kahangalan ay pinalipas na nga ng Diyos; datapuwa't ngayo'y ipinaguutos Niya sa mga tao na mangagsisi silang lahat sa lahat ng dako”

Gawa 26:20
“Kundi nangaral akong unang-una sa mga taga Damasco, at sa Jerusalem din naman, at sa buong lupain ng Judea, at gayon din sa mga Gentil, na sila'y mangagsisi at mangagbalik-loob sa Diyos, na mangagsigawa ng mga gawang karapatdapat sa pagsisisi.”

C. Minsan makikita namn natin na ang kaligtasan ay sa pamamagitan ng 

    pagsisisi at pananampalataya:

Gawa 20:21
“Na sinasaksihan ko sa mga Judio at gayon din sa mga Griego ang pagsisisi sa Diyos, at ang pananampalataya sa ating Panginoong Jesu-Kristo.”

Marcos 1:14-15
“Pagkatapos ngang madakip si Juan, ay napasa Galilea si Jesus na ipinangangaral ang evangelio ng Diyos, At sinasabi, Naganap na ang panahon, at malapit na ang kaharian ng Diyos: kayo'y mangagsisi, at magsisampalataya sa evangelio.”

Mula sa mga talatang ito makikita natin na hindi natin dapat paghiwalayin ang pagsisisi at pananampalataya. Sabi ni John Murray, "Imposible na paghiwalayin ang pananampalataya at pagsisisi. Ang ligtas na pananampalataya ay napuno ng pagsisisi, at ang pagsisisi ay napapuno ng pananampalataya.”

Papaano natin mapapakita ang ating pagsisisi?

A. Ang pagsisisi ay may nakapaloob na pagkilala ng ating kasalanan at 

    pagiging makasalanan

Awit 51:4-5
4 Sa Iyo lang ako nagkasalang tunay, at ang ginawa ko'y di Mo kinalugdan; kaya may katuwiran Ka na ako'y hatulan, marapat na ako'y Iyong parusahan. 5 Ako'y masama na buhat nang isilang, makasalanan na nang ako'y iluwal.”

B. Ang pagsisisi ay nakikitaan ng emosyonal na kalungkutan laban sa
    kasalanan

2 Corinto 7:9-10
“9 Ngayon ay nagagalak na ako sapagkat ang kalungkutang iyon ang ginamit ng Diyos para akayin kayo na pagsisihan at talikuran ang inyong pagkakasala, kaya't hindi kayo napinsala dahil sa amin. 10 Sapagkat ang kalungkutang buhat sa Diyos ay nagbubunga ng pagsisisi at pagbabago tungo sa kaligtasan. Ngunit ang kalungkutang dulot ng mundo ay humahantong sa kamatayan.”

C. Ang pagsisisi ay may nakapaloob na pagdedesisyong lumayo at  

    tumalikod na sa kasalanan

2 Corinto 12:21
“Nangangamba ako na pagpunta kong muli riyan, hiyain ako ng aking Diyos sa harapan ninyo, at itatangis ko ang karumihan, pakikiapid at kahalayang hindi pa pinagsisihan at tinatalikuran ng marami sa inyo.”

Papaano naman natin mapapakita ang ating pananampalataya?

A. Ang pananampalataya ay may nakapaloob na pasang-ayon kay Kristo

Juan 20:31

“Ngunit ang mga nakasulat dito ay isinulat upang kayo'y sumampalataya na si Jesus ang Kristo, ang Anak ng Diyos, at sa pagsampalatayang iyon ay magkaroon kayo ng buhay sa pamamagitan Niya.”

B. Ang pananampalataya ay may nakapaloob na kaalaman tungkol kay 

     Kristo

1 Corinto 15:1-4
“1 Mga kapatid, ngayo'y ipinapaalala ko sa inyo ang Magandang Balitang ipinangaral ko sa inyo. Iyan ang Magandang Balitang inyong tinanggap at naging saligan ng inyong pananampalataya. 2 Naliligtas kayo sa pamamagitan nito, kung matatag ninyong pinanghahawakan ang salitang ipinangaral ko sa inyo; maliban na lamang kung walang kabuluhan ang inyong pagsampalataya. 3 Sapagkat ibinigay ko sa inyo bilang pinakamahalaga sa lahat ang tinanggap ko rin: na si Kristo'y namatay dahil sa ating mga kasalanan, tulad ng sinasabi sa Kasulatan; 4 inilibing Siya at muling nabuhay sa ikatlong araw, tulad din ng sinasabi sa Kasulatan”

C. Ang pananampalataya ay may nakapaloob na pagtitiwala kay Kristo

Juan 1:12

“Subalit ang lahat ng tumanggap at sumampalataya sa kanya ay binigyan niya ng karapatang maging mga anak ng Diyos”

Papaano naman natin maipapaliwanag ang sinasabi sa Santiago 2:14-20?

14 Mga kapatid, ano ang pakinabang kung sabihin ng isang tao na siya'y may pananampalataya, ngunit hindi naman niya ito pinapatunayan sa gawa? Maililigtas ba siya ng ganoong uri ng pananampalataya? 15 Halimbawa, may isang kapatid na walang maisuot at walang makain. 16 Kung sasabihin ninyo sa kanya, “Patnubayan ka nawa ng Diyos; magbihis ka't magpakabusog,” ngunit hindi naman ninyo siya binibigyan ng kanyang kailangan, ano ang silbi niyon? 17 Gayundin naman, patay ang pananampalatayang walang kalakip na gawa. 18 Ngunit may nagsasabi, “May pananampalataya ka at may gawa naman ako.” Ipakita mo sa akin kung paano maaaring magkaroon ng pananampalataya nang walang mga gawa, at ipapakita ko naman sa iyo ang aking pananampalataya sa pamamagitan ng aking mga gawa. 19 Sumasampalataya ka na ang Diyos ay iisa, di ba? Mabuti naman! Ang mga demonyo man ay sumasampalataya rin, at nanginginig pa. 20 Isa kang hangal! Nais mo pa bang patunayan ko sa iyo na walang kabuluhan ang pananampalatayang walang kasamang gawa?

Kinokontra ba nito ang turo ni Pablo na tanging sa pananampalataya lang at hindi sa pamamagitan ng gawa ang kaligtasan? Tinuturo ba nito na maliligtas ang tao hindi lang sa pamamagitan ng pananampalataya kundi sa pamamagitan din ng gawa? Para masagot natin iyan ay tignan natin kung sino ang sinulatan ni Santiago sa 1:1-2, “1 Mula kay Santiago, lingcod ng Diyos at ng Panginoong Jesu-Cristo: Ipinapaabot ko ang aking pagbati sa lahat ng mga hinirang ng Diyos na nakikipamayan sa iba't ibang bansa. 2 Mga kapatid, magalak kayo kapag kayo'y dumaranas ng iba't ibang uri ng pagsubok.” Dito makikita natin na tinawag ni Santiago ang kanyang mga sinulatan na mga kapatid at binati na mga hinirang ng Diyos. Nakarating sa kaniya na hindi nakikita sa buhay nila ang pagiging taga-sunod ni Kristo. Kaya sinulatan niya sila para paalalahanan na bilang mga mananampalataya ay dapat nakikita ang bunga nito – ang bunga ng pananampalataya ay ang mabubuting gawa. Kung ikaw ay sumampalataya ngunit hindi nakikita sa buhay mo ang bunga ang pananampalataya mo ay sa nguso lang, hindi ikaw tunay na ligtas. Kaya ang gawa ay bunga hindi daan sa kaligtasan.

______________________________________________

PAG-ISIPAN:

1. Bakit hindi sa pamamagitan ng sariling gawa maliligtas ang tao?

2. Maliligtas ba ang tao sa pamamagitan ng pag-anib sa isang iglesya, pagsunod  

    sa utos ng Diyos? Bakit?

3. Kailang nagiging mahalag ang mabuting gawa?

PAGSASABUHAY:

1. Ano ang magiging epekto sayo matapos mong malaman na ang kaligtasan ay 

    pwede mong makamit o nakamit sa pamamagitan ng kagandahang-loob 

    at biyaya ng Diyos?

2. Papaano mo maipapakita ang mabuting gawa sa linggong ito sa mga tao
    sa iyong paligid?

PANANALANGIN:
Ipanalangin ang pagsasabuhay na nagawa na tulungan tayo ng Diyos na maipamuhay ito.

 

Daan sa Kaligtasan (Part 2 of 4) - ANG ATING DAAN PATUNGO SA DIYOS

Daan sa Kaligtasan (Part 2 of 4)
ANG ATING DAAN PATUNGO SA DIYOS

Nakaraan nakita natin ang malaking problema natin – nagkasala tayo sa Diyos at ang mga kahihinatnan natin dahil sa pagkakasala sa Kanya. Ang parusa sa kasalanan ay kamatayan. May dalawang paraan upang mabayaran ang parusang ito: una, dapat mamatay ang bawa’t tao dahil sa sariling kasalanan; o, ikalawa, sinumang walang kasalanan ay maaaring mamatay alang-alang sa may mga kasalanan. At sa pangalawang pag-aaral natin ay titignan natin ang daan patungo sa Diyos. May apat na bagay tayong titignan sa pag-aaral na ito: Ang Anak ng Diyos; Ang Kanyang Kamatayan; Ang Kanyang Muling Pagkabuhay; at Ang Daan.

Simulan natin sa…

I. ANG ANAK NG DIYOS

Marcos 1:1
“Ito ang Magandang Balita tungkol kay Jesu-Kristo, ang Anak ng Diyos.”

A. Si Jesus ang tunay na Anak
Ang Anak ng Diyos ay walang iba kundi si Jesu-Kristo. Sa panahon natin ay maraming nagsasabi na sila ang Kristo at ito ay hindi kataka-taka dahil noon pa man ay nagbigay na ng babala si Jesus patungkol sa bagay na ito. Sabi Niya sa Mateo 24:5, “Maraming paparito sa pangalan Ko at magpapanggap na sila ang Cristo, at marami silang maililigaw.” Malinaw na wala ng Kristo na inaasahang pang darating. Ngunit sabi sa talata na marami silang maliligaw. Hindi ito kataka-taka dahil ito ang sabi sa 2 Corinto 11:14 na, “Hindi ito kataka-taka sapagkat si Satanas man ay nagkukunwaring anghel ng liwanag.” Kaya mag-ingat tayo.

B. Ito’y pinatunayan ng Diyos
Ipinahayag ni Jesus na ang Diyos ang Kanyang Ama na Siyang kinapahamak Niya. Sabi sa Juan 5:18, “Lalo namang pinagsikapan ng mga Judio na ipapatay Siya, sapagkat hindi lamang Niya nilabag ang batas tungkol sa Araw ng Pamamahinga, sinasabi pa Niyang ang Diyos ang Kanyang Ama, at sa gayon ay ipinapantay ang Kanyang sarili sa Diyos.” Ang mga taong nagpapanggap ay pinapahayag nila na ang Diyos ang kanilang Ama at sila ang Anak ng Diyos. Pero hindi ito pinatotohanan ng Diyos. Ngunit kay Jesus ito’y pinatotohanan ng Diyos. Sabi sa Mateo 3:16-17, “Nang mabautismuhan si Jesus, kaagad Siyang umahon sa tubig. Nabuksan ang langit at nakita ni Jesus ang Espiritu ng Diyos na bumababang parang isang kalapati at dumapo sa Kanya. At isang tinig mula sa langit ang nagsabi, “Ito ang minamahal Kong Anak na lubos Kong kinalulugdan!”

C. Ito’y pinatunayan ng Kanyang buhay
Sabi ng mga tao na, “don’t judge the book by its cover,” pero ang sabi ni Jesus ay, “judge them by its cover.” Sabi ni Jesus sa Mateo 7:16-20, “16 Makikilala ninyo sila sa kanilang mga gawa. Mapipitas ba ang ubas sa puno ng dawag, o ang igos sa matitinik na halaman? 17 Mabuti ang bunga ng mabuting puno, subalit masama ang bunga ng masamang puno. 18 Hindi maaaring mamunga ng masama ang mabuting puno at hindi maaaring mamunga ng mabuti ang masamang puno. 19 Ang bawat punong hindi mabuti ang bunga ay puputulin at itatapon sa apoy. 20 Kaya't makikilala ninyo ang mga huwad na propeta sa pamamagitan ng kanilang mga gawa.” Kaya madaling malaman ang mga huwad na mga tao na nagsasabi na sila ang Kristo – tignan nyo ang kanilang pamumuhay.

Pero anong uri ng buhay ang ibinuhay ni Jesus? 1 Pedro 2:22, “Hindi Siya gumawa ng anumang kasalanan, o nagsinungaling kailanman.” Namuhay Siya ng malinis upang maging karapat-dapat na maghandog ng buhay para sa ating mga makasalanan.

II. ANG KANYANG KAMATAYAN

Dumating si Jesus sa mundong ito para ialay ang Kanyang buhay sa mga makasalanan. Pero bakit?

A. Upang iligtas ang mga makasalanan

1 Timoteo 1:15
“Totoo ang pahayag na ito at dapat paniwalaan ng lahat: Si Kristo Jesus ay dumating sa sanlibutan upang iligtas ang mga makasalanan. At ako ang pinakamasama sa kanila.”

Si Jesus ay dumating sa mundong ito upang tayong mga makasalanan na may malalang problema ay magkaroon ng pag-asa. Dumating Siya sa mundong ito para iligtas ang mga makasalanan dahil hindi natin kayang iligtas ang sarili sa sariling kaparaanan.

B. Upang maiharap tayo sa Diyos.

1 Pedro 3:18
“Sapagkat si Kristo na walang kasalanan ay namatay nang minsan para sa inyo na mga makasalanan, upang iharap kayo sa Diyos. Siya'y pinatay sa laman, at muling binuhay sa espiritu.”

Si Jesus bilang matuwid ay namatay para sa ating mga hindi matuwid upang tayo’y muling maibalik sa Diyos.

III. ANG KANYANG MULING PAGKABUHAY

1 Corinto 15:3, 4
“Sapagkat ibinigay ko sa inyo bilang pinakamahalaga sa lahat ang tinanggap ko rin: na si Kristo'y namatay dahil sa ating mga kasalanan, tulad ng sinasabi sa Kasulatan; inilibing Siya at muling nabuhay sa ikatlong araw, tulad din ng sinasabi sa Kasulatan.”

A. Ang mga saksi
Si Jesus ay hindi nanatiling patay. Ang kamangha-manghang bagay na nangyari sa Kanya pagkatapos Niyang mamatay ay ang muli Niyang pagkabuhay. Ito ay isang hindi kapani-paniwala na pangyayari kaya mahalaga ang mga saksi sa pangyayaring ito. Kanino Siya nagpakita ng Siya ay muling nabuhay? 

1 Corinto 15:4-8

“inilibing Siya at muling nabuhay sa ikatlong araw, tulad din ng sinasabi sa Kasulatan; at Siya'y nagpakita kay Pedro, at saka sa Labindalawa. Pagkatapos, nagpakita Siya sa mahigit na limandaang kapatid na nagkakatipon. Marami sa kanila'y buháy pa hanggang ngayon, subalit patay na ang ilan. At nagpakita rin Siya kay Santiago at pagkatapos ay sa lahat ng mga apostol. Sa kahuli-huliha'y nagpakita rin Siya sa akin (Pablo), kahit na ako'y tulad ng isang batang ipinanganak nang wala sa panahon.”

May mga nakapagsabi na maaaring nabayaran lang daw sila para magsabi ng kasinungalingan. Kabaligtaran ang nangyari dahil sa kanilang patotoo na si Jesus ay muling nabuhay nawala ang lahat sa kanila maging ang kanilang buhay. Tignan natin kung papaano ba namatay ang mga apostol dahil sa kanilang patotoo sa muling pagkabuhay ni Jesus:

Simon Peter – Pinako sa krus ng pabaligtad.
Andrew, kapatid ni Peter – Pinako sa krus.
James, anak ni Zebedee – Pinugutan ng ulo ni Herod Agrippa I.
John, kapatid ni James – Tinapon sa kumukulong mantika pero nabuhay kaya ipinatapon sa isala ng Patmos at doon namatay sa katandaan.
Matthew – Namatay sa pagpapahirap sa Ethiopia
Bartholomew, kilala tawag ding Nathaniel – Binugbog sabay pinako sa krus.
Philip – Pinako sa krus.
Thomas – sinaksak hanggang sa mamatay.
Simon, na makabayan – Pinako sa krus.
James – Binato hanggang sa mamatay.
Thaddaeus, kilala din sa tawag na Judas na anak ni James - Binato hanggang sa mamatay.

Walang taong matino ang mamamatay ng brutal para sa isang kasinungalingan. Isa lang ang ibig sabihin nito, tiniis nila ang grabeng pahirap na ito dahil totoo ang kanilang patotoo.

B. Ang pangko
Tiniis ng mga saksi ang matinding hirap sa kanilang pagpapatotoo dahil pinang hawakan nila ang pangako ni Jesus sa Kanyang muling pagkabuhay. Sabi sa Juan 14:19, “Kaunting panahon na lamang at hindi na Ako makikita ng sanlibutang ito. Ngunit Ako'y makikita ninyo; sapagkat buháy Ako, mabubuhay rin kayo.” Alam ng mga apostol at mga Kristiyanong namatay dahil kay Kristo na ang kaunting panahon na paghihirap ay hindi matutumbasan ng pangakong kanilang pinanghahawakan.

C. Ang bunga
Sapagkat nabubuhay si Jesus magpakailanman maliligtas ang lahat ng sasampalataya sa Kanya. Sabi sa Hebreo 7:25, “Dahil dito, lubusan Niyang maililigtas ang lahat ng lumalapit sa Diyos sa pamamagitan Niya, sapagkat Siya'y nabubuhay magpakailanman upang mamagitan para sa kanila.”

Si Jesu-Kristo ang tanging tulay ng tao sa Diyos. Bilang Anak ng Diyos, wala Siyang kasalanan at maaaring mamatay para sa iba. Pagkamatay Niya alang-alang sa mga tao, Siya’y nabuhay mula sa mga patay. Sa pamamagitan ng pagkabuhay na ito’y iniligtas Niya ngayon ang mga taong lumalapit sa Diyos sa pamamagitan Niya.

IV. ANG DAAN

A. Ang dapat gawin
May dalawang bagay na dapat gawin ang mga makasalanan upang sila ay lumipat mula sa kamatayan patungo sa buhay – Ang pakikinig sa salita ni Jesus at pananampalataya sa nagsugo sa Ama.

Juan 5:24
“Pakatandaan ninyo: ang nakikinig sa Aking salita at sumasampalataya sa nagsugo sa Akin ay may buhay na walang hanggan. Hindi na siya hahatulan kundi nakatawid na siya sa buhay mula sa kamatayan.”

Dalawa lang ang tao sa mundo ang mga sumampalataya at mga hindi sumampalataya. Ang mga sumapalataya ay may buhay na walang hanggan at ang mga hindi sumampalataya ay mananatili sa kanila ang poot ng Diyos. Makikita natin iya sa Juan 3:36, “Ang sumasampalataya sa Anak ay may buhay na walang hanggan. Ngunit ang hindi sumusunod sa Anak ay hindi magkakaroon ng buhay. Sa halip, mananatili sa kanya ang poot ng Diyos.”

B. Wala nang iba.
Bukod sa pananampalataya kay Kristo wala nang iba pang paraan para mapatawad ang tao sa kanyang kasalanan at magkamit ng buhay ng walang hanggan. Tignan natin ang ilang mga talatang ito:

Gawa 4:12
“Sa Kanya lamang matatagpuan ang kaligtasan, sapagkat walang ibang pangalan ng sinumang tao sa buong mundo na ibinigay ng Diyos sa mga tao upang tayo ay maligtas."

Juan 14:6
“Sumagot si Jesus, Ako ang daan, ang katotohanan, at ang buhay. Walang makakapunta sa Ama kundi sa pamamagitan Ko.”

Ang salitang “Ang (The)” ay tinatawag na definite article sa Engles. Ang indefinite article naman ay “ay (a).” Ano ang pinagkaiba ng dalawang ito? Tignan ang halimbawa ng pangungusap na ginamit:

Indefinite article: “Ako ay gwapo.”
- Ibig sabihin nito na sinasabi niya na isa lang siya sa marami pang gwapo.

Definite article: “Ako ang gwapo.”
- Ibig sabihin nito na sinasabi niya na siya lang ang gwapo at wala ng iba pa.

Kaya ng ginamit ni Jesus ang definite article na “ang” ng sinabi Niya na, “Ako ang daan, ang katotohanan, at ang buhay,” malinaw na sinasabi Niya na wala ng iba bukod sa Kanya.

______________________________________________

PAG-ISIPAN:
1. Bakit si Jesus ang tunay na Anak ng Diyos?
2. Bakit namatay si Jesus sa krus?
3. Bakit mahalaga na si Jesus ay muling nabuhay?
4. Sabi sa napag-aralan natin na si Jesus lang ang tanging daan sa Ama. Sa inyong palagay ano ang iba pang ginawang daan o paraanan ng tao sa pag-aakala nila na isa pang daan para maligtas ang tao bukod kay Kristo


PAGSASABUHAY:
1. Tulad ni Jesus na namuhay na malinis, ano ang mga hakbang na gagawin mo upang makapamuhay ka ng malinis sa harap ng Diyos?
2. Nakita natin ang mga pagtitiis na hinarap ng mga apostol at mga Kristiyano sa kasaysayan ng dahil sa pagsunod kay Kristo. Ano ang sakripisyo na kaya mong ibigay sa Diyos tanda ng pagsunod mo sa Kanya?
3. Ikaw ba ay sumasampalataya kay Jesus na Siya lamang ang Panginoon at Taga-Pagligtas ng iyong buhay?

PANANALANGIN:
Ipanalangin ang pagsasabuhay na nagawa na tulungan tayo ng Diyos na maipamuhay ito.

Daan sa Kaligtasan (Part 1 of 4) - ANG ATING MGA PROBLEMA SA DAAN SA KALIGTASAN

 Daan sa Kaligtasan (Part 1 of 4)

ANG ATING MGA PROBLEMA SA DAAN SA KALIGTASAN

 

Lahat tayo dito ay may problema. Pero anong maaaring mga problema ang dahilan para mabalisa, di makatulog, at matakot ng sobra ang isang tao ngayon? Maaaring pagkakaroon ng malalang sakit, pagkakaroon ng malalaking bayarin, o maling gawa na may hindi magandang kahihinatnan. Lahat tayo ay may problema at ito ay magkakaiba. Pero merong problema ang lahat ng tao na hindi natin alam. Dahil kung alam ito ng lahat ay lahat ay mababalisa, di makakatulog, at matatakot ng sobra na dahilan para gawin ang lahat para matakasan o masolusyunan ito. Ano ang mga problemang ito? Ito ang problema patungkol sa kaligtasan.

Ang layunin ng ating pag-aaralan na may apat na part ay maging tunay at tiyak ang kaligtasan ng bawat isa. Layunin nating masagot ang tanong na, “paano ako maliligtas?” Tatawagin natin ang serye ng pag-aaral na ito na, “Daan sa Kaligtasan.” Sa unang bahagi ng pag-aaral natin ngayon ay may layunin naman na makapagmulat sa atin sa katotohanan na tayo ay may problema na mag tutulak sa atin para makagawa ng tamang desisyon ano man ang kalagayan nyo ngayon sa espirituwal – kayo man ay hindi pa sigurado sa inyong kaligtasan o nagsasabi na isa na siyang mananampalataya. Kaya ang ating pamagat po ng ating pag-aaralan ay “ANG ATING MGA PROBLEMA SA DAAN SA KALIGTASAN.”

Tignan natin ngayon ang mga problema sa daan sa kaligtasan.

I. Ang Problema sa Maling Akala

Ang espirituwal na panlilinlang ay ganap na possible. Ang isa sa pinaka nakakatakot na talata para sa akin bilang Pastor ay ang Mateo 7:21-23. Pakinggan natin ang sabi ni Jesus:

“Hindi lahat ng tumatawag sa Akin, ‘Panginoon, Panginoon,’ ay papasok sa kaharian ng langit, kundi ang mga taong sumusunod sa kalooban ng Aking Ama na nasa langit. Sa Araw ng Paghuhukom marami ang magsasabi sa Akin, ‘Panginoon, hindi po ba't sa iyong pangalan ay nangaral kami, nagpalayas ng mga demonyo at gumawa ng mga himala?’ Ngunit sasabihin Ko sa kanila, ‘Hindi Ko kayo kilala. Lumayo kayo sa Akin, kayong mga gumagawa ng kasamaan.’”

Ang talatang iyan madalas na nagbibigay sa akin ng kabigatan bilang Pastor na isipin na merong mga tao, maraming mga tao, na sinabi ni Jesus, na magugulat isang araw na malaman nila na, bagama’t tinuro at sinabi sa kanila na sila ay ligtas sa harapan ng Diyos, hindi pala. Na merong maraming tao, sa araw na iyon, na magugulat na akala nila sila ay na sa tamang daan na magdadala sa kanila sa Kaharian ng Diyos, pero ang reyalidad ay sila ay nasa daan patungong impyerno. Iyan ay nakakatakot.

Kung tutuusin, kung titignan natin muli ang talatang ating binasa, may pinanghahawakan ang mga taong ito na sila ay ligtas dahil sa magagandang bagay na ginagawa nila. Maaaring marami sa atin ngayon na hindi natin nagagawa ang mga pinagmamalaki nila tulad ng pangangaral ng Salita ng Diyos, pagpapalayas ng demonyo at paggawa ng isang himala. Ang mga ito kung titignan natin ay masasabi natin na tiyak na ang mga taong ito ay ligtas. Pero nakakagulat na sinabi ni Jesus na hindi sila ligtas. Paano nalang tayong mga taong hindi manlang nagagawa ang kahit isa sa mga ito. 

Huwag ninyo itong kaligtaan. Si Jesus ang nagsabi nito. Ito yung sermon sa bundok, Mateo 7. Siya ay nagsasalita, hindi sa mga atheist at sa mga agnostic at sa mga pagans at sa mga heretic; Siya’y nagsasalita sa mga relihiyosong tao. Mga debotong reliyoso, na mga nag-aakalang sila’y mga ligtas, pero hindi naman. Mga taong magugulat kapag nalaman nila isang araw na sila ay hindi makakapasok sa Kaharian ng Diyos. Ang reyalidad dito, sa Mateo 7: posible na maloko natin ang ating sarili pag dating sa ating espirituwal na kondisyon. Posible na madaya natin ang ating sarili pag dating sa importanteng tanong sa buhay - “papaano ako maliligtas? Tulad nila marahil marami sa atin ngayon dito na kampante na ligtas tayo kasi lagi naman tayo nagsisimba, kasi tumanggap naman tayo kay Jesus at sumunod sa panalangin ng pagtanggap.

Naniniwala ako na maraming tao ang mapupunta sa impyerno na mabubuting tao at mababait sa paningin natin. Kasi marami ang nag-iisip na ito ang daan sa kaligtasan, na ito ang paraan para maligtas. Naniniwala din ako na marami ang mapupunta sa impyerno na mga taong minsang nag sabi sa buhay nila dito na sila ay sumasampalataya kay Jesus. Ang problema lang ay hindi nakita sa kanila ang pagbabago. Iyan ang problema kapag pakitang-tao lang ang ating pagiging Kristiyano. Iyan ang problema kapag tayo’y Kristiyano lang sa nguso at hindi sa puso. Sabi nga sa Santiago 1:22-25,

“22 Mamuhay kayo ayon sa salita ng Diyos. Kung ito'y pinapakinggan lamang ninyo ngunit hindi isinasagawa, dinadaya ninyo ang inyong sarili. 23 Sapagkat ang nakikinig ng salita ngunit hindi sumusunod dito ay katulad ng isang taong tumitingin sa salamin, 24 at pagkatapos makita ang sarili ay umaalis at kinakalimutan ang kanyang anyo. 25 Ang taong nagsasaliksik at nagpapatuloy sa pagsunod sa Kautusang ganap na nagpapalaya sa tao ang pagpapalain ng Diyos sa lahat ng kanyang gawain. Siya ang taong gumagawa at hindi siya katulad ng nakikinig lamang at pagkatapos ay nakakalimot.”

Kaya ang tanong sa ating ngayon ay, sino tayo kapag tayo lang at walang nakakakita? Doon lalabas kasi ang tunay na pagkatao natin at tanda ng kalagayan ng ating espiritu.


II. Ang Problema na Dulot ng Kasalanan

Noong pasimula, napakalapit ng kaugnayan ng tao at ng Diyos. Ang sa kanila’y matalik na pagkakaibigan, at hindi lamang malamig na pakikipagtunguhan ng Manlilikha at nilikha sa isa’t-isa. Nilalang ng Diyos ang tao upang Kanyang ibigin, at upang ibigin din naman Siya ng tao. Ang nais Niya’y malayang makalapit sa Kanya ang tao at maglingkod sa Kanya dahil sa pag-ibig, at di dahil sa takot. Gayunman, sa pamamagitan ng ating unang magulang, ang magandang ugnayan ay nawala dahil sa kasalanan. At naglaho sa ating buhay ang pakikisama ng Diyos. Ano ang dahilan ng nasirang pagkakaibigan?

Roma 5:12
“Ang kasalanan ay pumasok sa sanlibutan sa pamamagitan ng isang tao, at ang kamatayan ay pumasok sa pamamagitan ng kasalanan. Dahil dito, lumaganap ang kamatayan sa lahat ng tao dahil ang lahat ay nagkasala.”

ISAIAS 59:2  
“Ang masama ninyong gawa ang dahilan ng pagkawalay ninyo sa Diyos. Nagkasala kayo kaya hindi ninyo Siya makita, at hindi Niya kayo marinig.”

Malinaw na ang kasalanan ang naging pangunahing dahilan upang masira ang magandang ugnayan ng tao sa Diyos. Nag bigay ang Bibliya ng dalawang paraan kung papaano tayo nahuhulog sa kasalanan:

1. SANTIAGO 4:17
“Ang nakakaalam na dapat niyang gawin ang mabuti ngunit hindi iyon ginagawa ay nagkakasala.”

2. 1 JUAN 3:4
“Ang bawat nagkakasala ay lumalabag sa kautusan ng Diyos, sapagkat ang kasalanan ay paglabag sa kautusan.”

At lahat tayo ay guilty sa bagay na ito. Sabi nga sa Roma 3:23, “Sapagkat ang lahat ay nagkasala, at walang sinumang nakaabot sa kaluwalhatian ng Diyos.”

Maaaring may mga taong makakapag mayabang sa sarili na kung ikukumpara nila ang kanilang sarili sa iba hindi naman sila ganoon kasama. Pero ano ang nakikita ng Diyos sa puso ng tao?

MARCOS 7:20-22
“At sinabi rin Niya, ‘Ang lumalabas sa tao ang nagpaparumi sa kanya sa paningin ng Diyos. Sapagkat sa loob, sa puso ng tao, nagmumula ang masasamang isipang nag-uudyok sa kanya upang makiapid, magnakaw, pumatay, mangalunya, mag-imbot, gumawa ng kasamaan tulad ng pandaraya, kahalayan, pagkainggit, paninirang-puri, pagmamayabang, at kahangalan. Ang lahat ng ito ay nanggagaling sa puso at ang mga ito ang siyang nagpaparumi sa kanya."

Nakikita sa puso ng lahat ng tao na ito ay marumi. Ang kasalanan ay hindi panlabas na kilos lamang. Maaaring ito’y isang masama o maruming isipang-kinikimkim sa puso. Halimbawa, ayon sa pamantayan ng Diyos, ang taong namumuhi sa kapwa ay nagkakasala sa anong kasalanan?

1 JUAN 3:15
“Mamamatay-tao ang napopoot sa kanyang kapatid, at nalalaman ninyong ang buhay na walang hanggan ay wala sa mamamatay-tao.”

Isa pang halimbawa, sa anong paraan din magagawa ang kasalanang pangangalunya bukod sa pagganap nang tuwiran dito?

MATEO 5:28
“Ngunit sinasabi Ko sa inyo, ang sinumang tumingin sa isang babae nang may mahalay na pagnanasa ay nangangalunya na sa babaing iyon sa kanyang puso.”

Ilan lamang ito sa daan pang mga talatang mababasa sa Biblia na nagpapakita kung gaano tayo makasalanan sa paningin ng Diyos. Pinapakita lang nito na lahat tayo nagkakasala; may mali o masamang nagawa sa ating buhay at maling desisyon na nagawa –pero may mas malala pa tayong problema dito.


III. Ang Problema na malala

May mas malala pa sa katotohanan na tayo ay nagkasala. Maaaring magkasala ako sa bata pero hindi ito mabigat na problema. Pero kung nagkasala ako kahit na sa maliit na bagay lang sa Presidente ng North Korea, o kay Queen Elizabeth magdasal dalasal kana. Makikita natin ang bigat ng kasalanan sa kung kanino tayo nag kasala. Kaya ang unang malalang problema natin ay hindi dahil sa nagkasala tayo, ang malala natin problema ay…

A. Nagkasala tayo sa Diyos
Punta tayo sa Genesis 3, ang simula ng pagpasok ng kasalanan sa sanlibutan, para mapaalalahanan tayo sa kung ano talaga ang sentro ng kasalanan.

Genesis 3:1-7
1 Ang ahas ang pinakatuso sa lahat ng hayop na nilikha ng Panginoong Yahweh. Isang araw tinanong nito ang babae, “Totoo bang sinabi ng Diyos na huwag kayong kakain ng anumang bungangkahoy sa halamanan?” 2 Sumagot ang babae, “Maaari naming kainin ang anumang bunga sa halamanan, 3 huwag lamang ang bunga ng puno na nasa gitna niyon. Sinabi ng Diyos na huwag naming kakainin ni hihipuin man ang bunga nito; kung kami raw ay kakain nito, mamamatay kami.” 4 Ngunit sinabi ng ahas, “Hindi totoo iyan, hindi kayo mamamatay! 5 Sinabi lang iyan ng Diyos, sapagkat alam Niyang kung kakain kayo ng bunga niyon ay makakaunawa kayo. Kayo'y magiging parang Diyos at malalaman ninyo ang mabuti at masama.” 6 Ang punongkahoy ay napakaganda sa paningin ng babae at sa palagay niya'y masarap ang bunga nito. Naisip din niya na kahanga-hanga ang maging marunong, kaya't pumitas siya ng bunga at kumain nito. Binigyan niya ang kanyang asawa, at kumain din ito. 7 Nagkaroon nga sila ng pagkaunawa matapos kumain. Noon nila nalamang sila'y hubad, kaya kumuha sila ng mga dahon ng igos, pinagtahi-tahi nila ang mga ito at ginawang panakip sa katawan.”

Ano ang mga katotohanang makikita natin dito?

a. Tinakwil natin ang Salita ng Diyos
Gusto kong mapansin ninyo dito kung paano nagsimula ang kasalanan. Ang unang talata sa Genesis 3, “Ang ahas ang pinakatuso sa lahat ng hayop na nilikha ng Panginoong Yahweh. Isang araw tinanong nito ang babae, “Totoo bang sinabi ng Diyos…” Ngayon, dapat itong si Eba ay naghinala na sa panahon na narinig niya ang salitang, “totoo bang sinabi ng Diyos,” at dapat din naghinala siya sa kung bakit nagsasalita ang ahas sa kanya. Isa lang ang mga iyan para maghinala.

Mas malalim pa dito, ang tanong na, “totoo bang sinabi ng Diyos…” sa unang pagkakataon sa patagong paraan. Ang palihim na ito, ay mapanlinlang na kaisipan na dumating sa sanlibutan, na ang Salita ng Diyos ay nasa ilalim ng husga ng tao, at ito ang humihimok sa kasinungalingan… ang kaisipang iyon ay humihimok sa kasinungalingan mula pa noon. Ito ay popular nasalita na, “totoo bang sinabi ng Diyos?” Ito ay delikado. Tinanggihan natin ang Salita ng Diyos at ito’y pinagdududahan. Dahil kung hindi ito totoo sa mga tao mas magtitiwala sila dapat sa Salita ng Diyos – ito’y kanilang babasahin araw-araw, pagbubulayan, susundin at ipamumuhay. Pero mas pinagkatiwalaan ng tao ang mga hula, horoscope, pamahiin, kasabihan, paniniwala, kultura, fung sui, mga salita ng mga maimpluwensyang tao, atbp. – sa madaling salita tulad nila Eba’t Adan mas pinakinggan ng tao si Satanas.

b. Tumanggi tayong magpasakop sa Diyos
Giniit natin ang kalayaan mula sa Diyos. Sinabi ng Diyos, “Huwag kayong kumain ng bunga sa punong iyan.” Pero ang sabi natin, “kakain parin kami doon, hindi ikaw ang masusunod sa amin.” At ito ay totoo rin sa ating lahat at nakikita natin sa ating sarili na hindi tayo nagpapasakop ng kalooban ng Diyos. Hindi lang ito…

c. Tumanggi tayong kilalanin Siya.
Ito si Eba, sa kanyang kasalanan. Ang kasalanan naman ni Adan ay nagsasabi, “Ang kaparaanan ng Diyos ay hindi mabuti para sa amin. Ang kaparaanan namin ay mas mabuti. Hindi mabuti ang Diyos sa amin, mas mabuti ako.” Nakita nyo yung essence ng kasalanan dito? Mas pinagkatiwalaan nila Eba’t Adan si Satanas kaysa magtiwala sa Diyos. Ang nakakatakot dito…sa panahon na nagkakasala tayo, hindi man natin tuwirang sinasabi ito, pero ito ang larawan natin na nagsasabi sa Diyos na, “Ang kaparaanan mo ay hindi mabuti. Meron akong mas mabuting kaparaanan. Hindi ako nagtitiwala Sayo.” Ito ang ating kasalanan.

Ang pangalawang malalang problema natin ay


B. Ang kahihinatnan ng pagkakasala natin sa Diyos.

Ano ang bunga ng pagkakasala nating ito sa Kanya?

a. Pagkahiwalay sa Diyos
Roma 3:23
“Sapagkat ang lahat ay nagkasala, at walang sinumang nakaabot sa kaluwalhatian ng Diyos.”

b. Kamatayan
Roma 6:23
“Sapagkat kamatayan ang kabayaran ng kasalanan”

c. Walang hanggang buhay sa impyerno
Hebreo 21:8
“…ang magiging bahagi nila'y sa lawa ng nagliliyab na apoy at asupre. Ito ang pangalawang kamatayan.”

Ang kamatayang espiritwal ay hindi lamang pagkahiwalay sa Diyos ngayon. Ito’y nangangahulugan ng walang hanggang pagkahiwalay sa Diyos at walang katapusang kaparusahan sa lawang Apoy – ang impyerno. Ipinakita ng ilang talata sa itaas ang kalagim-lagim na kalagayan ng lahat ng tao, bunga ng kasalanan. Sinasabi ng Diyos na wala tayong magagawa upang maligtas ang ating sarili. Talagang, ito’y larawan ng kawalang pag-asa.

Ito ba ay alam ng lahat ng tao? Duda ko hindi. Dahil kung mulat ang lahat sa katotohanang ito, ito ay magdudulot ng lubusang kabalisaan gaya ng kung papaano tumutugon ang tao sa kanya-kanyang mabibigat na problema. Ngayong nanalaman at naunawaan nyo na ang totoong problema ng tao patungkol sa kaligtasan, meron itong dalawang hamon sa bawat-isa sa atin:

1. Sa mga hindi pa mananampalataya
Sa mga hindi pa mananampalataya ang pagtanggap sa katotohanang ito na ating pinag-aralan ang magiging unang hakabang para hanapin ang kaligtasan sa Diyos. Hindi hihingi ng tulong ang tao kung hindi niya nakikita na kailagan nya ng tulong. Importante na pagbulay-bulayan mo ito at harapin ang katotohanan.

2. Sa mga nagsasabing sila ay mananampalataya na
Ito ay panahon para suriin ninyo ang inyong sarili.

2 Corinto 13:5
“Subukin ninyo ang inyong mga sarili kung kayo'y namumuhay ayon sa pananampalataya. Suriin ninyo ang inyong sarili. Hindi ba ninyo nalalamang nasa inyo si Kristo Jesus? Maliban na lang kung kayo'y mga bigo sa pagsubok.”

Tiyakin ang iyong kaligtasan. Isa pa ay kung talagang nauunawaan natin ang mabigat na problema ng mga taong hindi pa kumikilala kay Jesus ay buong tiyaga nating ibabahagi ang Magandang Balita, naniniwala ako na higit lalo sa ating mga mahal sa buhay at kaibigan.

 

_________________________________________________________________

PAG-ISIPAN:
1. Paaano napupunta sa maling akala ang mga taong nagsasabing sila’y ligtas ngunit hindi pala?
2. Ano ang pinaka matinding problema ng tao patungkol sa kaligtasan?
3. Nakikita bas a buhay mo ang tanda na ikaw ay tunay na ligtas may nakakakita man o wala?


PAGSASABUHAY:
1. Ano ang iyong napagtanto patungkol sa iyong sarili sa harap ng Diyos? Karapat dapat ba tayong parusahan ng Diyos sa impyerno? Bakit?
2. a. Kung ikaw ay hindi pa tiyak sa iyong kaligtasan ano ang unang hakbang na dapat mong gawin para ang kaligtasan ay maging posible sayo?
b. Kung ikaw ay tiyak na sa iyong kaligtasan sino ngayon ang nais mong bahaginan ng Magandang Balita?


PANANALANGIN:
Ipanalangin na tulungan tayo ng Diyos na maisabuhay ang ginawang desisyon sa pag-aaral.