Ang Ano, Bakit, at Paano ng Pagdidisipulo (Part 1 of 3)

Ang Ano, Bakit, at Paano ng Paggiging Disipulo 

Equip To Serve Class

Panimula:
Nais ko kayong tanungin. Ano ang pumapasok sa isip ninyo kapag narinig ninyo ang salitang “Discipleship”?

(Maaaring ipasulat sa kapirasong papel o sa pagtawag ng ilang mga taga pakinig)


Gaano ninyo kaya seseryosohing gawin ang isang huling habilin ng isang taong mahalaga sa buhay nyo na malapit ng magpaalam (mamatay) sa inyo? Malamang po ay tiyak na gagawin natin hanggat kaya ano pa man ang hiling ng namaalam na mahal natin sa buhay. At lalo na siguro nating gagawin ang huling habilin kung ang namaalam na mahal natin sa buhay ay muling nabuhay at nag-iwan ng huling habilin bago magpaalam muli. Ganito ang nakita nating nangyari sa ating Panginoong Jesus nang Siya ay muling nabuhay pagkatapos mamatay sa krus. At nang Siya ay muling nabuhay at bago umakyat pabalik sa Ama ay nag-iwan Siya ng huling habilin sa Kanyang mga alagad na kilala sa tawag na ang Dakilang Atas. Ano kaya ito? Mababasa natin ito sa Mateo 28:18-20,

18 Lumapit si Jesus at sinabi sa kanila, “Ibinigay na sa Akin ang lahat ng kapangyarihan sa langit at sa lupa. 19 Kaya't humayo kayo, gawin ninyong alagad Ko ang mga tao sa lahat ng mga bansa. Bautismuhan ninyo sila sa pangalan ng Ama, at ng Anak, at ng Espiritu Santo. 20 Turuan ninyo silang sumunod sa lahat ng iniutos Ko sa inyo. Tandaan ninyo, Ako'y laging kasama ninyo hanggang sa katapusan ng panahon.”

Mula sa mga talatang ito titignan natin at sasgutin ang Ano, Bakit, at Paano sa pagdidisipulo. Meron tayong tatlong bahagi ng pag-aaral na ito. Mag simula tayo sa ano ang pagdidisipulo?

Ano Ba ang Disipulo? 

Ano ba ang ibig sabihin na maging disipulo ni Jesus? Kung malalaman nyo, ang sagot ay simple lang, pero babaguhin nito ng lubusan ang buhay mo.

“Mathetes” ang salitang Griego sa Bibliya para sa salitang disipulo. Ang unang pakahulugan ay pagiging mag-aaral o estudyante. Pero hindi kagaya ng kahulugan sa ating panahon para matuto ng isang subject kagaya ng algebra o biology, ang salitang disipulo ay mas malalim ang kahulugan sa panahon ni Jesus. Ito ay pagiging tagasunod ng katuruan ng isang nagtuturo.

Papaano ba magiging disipulo sa panahon ni Jesus? 

Sa panahon nila Jesus ang mga bata sa isang komunidad ay pumupunta sa isang kwarto sa gilid ng kanilang Sinagoga para mag aral. Ang tawag sa unang level ng pag-aaral nila ay “Beth Sefer” (katulad nito ang elementary level sa atin). Ang curriculum nila dito ay “Torah” - ang unang limang aklat sa Lumang Tipan (Genesis, Exodo, Levitico, Bilang at Deuteronomio). Ito ang level para matuto ang mga batang bumasa at sumulat at mag kabisado ng mga kasulatan sa Torah. At sa panahon na sila ay matatapos sa Beth Sefer sila ay mga nasa 12 o 13 taong gulang na at marami sa kanila ay alam na ang malaking bahagi ng unang limang libro at marami sa kanila ang kabisado na ang malaking bahagi nito. Alam nila kung ano ang nasa mga Torah at kaya na nilang unawain at ipaliwanag.

Pagkatapos ng ilang kabataan sa Beth Sefer, may ilang may kakayahang magpatuloy sa susunod na level (Katulad sa atin sa High School level). Ang tawag dito ay “Beth Midrash”. Ang pinag-aaralan nila dito ay ang mas malalim na kahulugan sa Torah at nagpapatuloy sa “Tenach” (Tenah) - ito ang mga sulat ng mga propeta at ilan pang aklat sa Lumang Tipan. Kagaya ng sa una ay pinag-aaralan nila ito at kinakabisado ang lahat ng nakalagay dito.

Pagkatapos naman nila sa Beth Midrash, may ilan at mas kunti ang may mas kakayahang magpatuloy at may posibilidad na maging isang tinatawag sa Hebreo na “Talmid” - ito ang salitang hebreo na ang ibig sabihin ay disipulo. Ang isang seryosong mag-aaral na nagnanais na maging isang Talmid ay magsisimulang mag hanap ng isang magaling na guro. Para siya ay piliin na maging talmid kailangan niyang pakitaan ito ng di matawarang karunungan na meron siya sa kanyang mga pinagdaanang pag-aaral sa Kasulatan. Ikakabisa niya rito ang buong Kasulatan. Ipapakita niya ang galing niya sa pagpapaliwanag at pagsasalita sa mga Kasulatan. At kapag na impress na ang guro sasabihin nito sa kanya na, “come follow me” (sumunod ka sa akin o magiging disipulo kita). Nangangailangan talaga ng matinding disiplina ang mga nais maging talmid.


Ang pagiging tunay na disipulo 

Ang pagiging Talmid o disipulo sa panahon nila ay ang taong may matindi at di mapantayan na pagnanais na maging katulad ng kanilang guro. Gustong gusto niyang gayahin kung ano ang ginagawa nya - kung papaano siya kumilos at magsalita. Ganun din dapat sa mga taong gustong maging tagasunod ni Jesus. Gaano ba ang kagustuhan mong maging katulad ni Jesus? Maging katulad Niya na naging kalugod-lugod sa Ama.

2 Pedro 1:17
“Nang tanggapin Niya mula sa Ama ang karangalan at kapurihan. Ito’y nangyari nang marinig namin ang tinig mula sa dakilang kaluwalhatian ng langit na nagsabing, ‘Ito ang minamahal Kong Anak na lubos Kong kinalulugdan.’”

Bakit kinalulugdan ng Ama si Jesus? Dahil sabi ni Jesus sa Juan 8:29, “sapagkat lagi Kong ginagawa ang kalugud-lugod sa Kanya.”

Muli, gaano ba ang kagustuhan natin na mamuhay na tulad ni Jesus at maging kalugod-lugod sa Diyos


Come Follow Me

Hindi tulad ng sa panahon ni Jesus, hindi natin kailangang ipakita o patunayan sa Kanya na tayo’y karapat-dapat na maging disipulo Niya. Hindi rin tayo ang naghanap sa Kanya at nag sabing nais kong maging tagasunod Niya. Nakita natin na si Jesus ang pumunta sa mga ordinaryong tao at nagsabi sa kanila na “come follow me.” Ito ay isang dakilang biyaya na hindi dapat bale-walain. Hindi ang nawawalang tupa ang maghahanap sa kanyang pastol. Laging ang pastol ang naghahanap sa kanyang nawawalang tupa. Tandaan natin ito:

Roma 8:28-29
28. “Alam nating sa lahat ng bagay ay gumagawa ang Diyos para sa ikabubuti ng mga nagmamahal sa Kanya, silang mga tinawag ayon sa Kanyang layunin. 29 Sapagkat sa mula’t mula pa’y alam na ng Diyos kung sino ang magiging Kanya at ang mga ito’y pinili upang maging tulad ng Kanyang Anak. Sa gayon, ang Anak ang naging panganay sa lahat ng maraming magkakapatid.”


Imposible

Mula sa ating mga nakita masasabi natin na ang ibig sabihin ng biblikal na disipulo ay ang isang taong may matindi at di mapantayang pagnanais na maging katulad ni Jesus - ang maging kalugud-lugod sa Diyos Ama dahil sa pagsunod sa nais Niya.

Tandaan natin na imposible na maging isang disipulo o taga-sunod ng sinuman at hindi mauwi sa pagiging katulad ng taong iyon. Sabi ni Jesus, “Walang alagad na nakakahigit sa kanyang guro, ngunit matapos maturuang lubos, ang alagad ay makakatulad ng kanyang guro.” (Lucas 6:40). Iyan ang lubusang punto ng pagiging tunay na disipulo ni Jesus: ginagaya natin Siya, ginagawa rin ang ministeryo Niya, at ang maging katulad Niya sa proseso. Iyan ang ibig sabihin ng pagiging isang tunay na Kristiyano. Lahat kasi ngayon ay nagsasabi na sila ay Kristiyano na hindi naiintindihan kung ano ba talaga ang ibig sabihin nito. Ang salitang Kristiyano ay isang tawag na panlait sa mga unang mananampalataya. Tinatawag silang mga munting Kristo o Kristiyano. Pero sa mga tinatawag ng ganito ito ay hindi panlait kundi isang karangalan sa kanila na tawaging Kristiyano kasi ibig sabihin nito na nakikita ng mga taong ito si Kristo sa kanilang pamumuhay.

Tayo ba na nagsasabi na isang Kristiyano o disipulo ni Kristo ay nakikita sa atin ng ibang mga tao si Kristo sa kilos natin, sa salita natin at gawa? Papaano nangyayari ito? Halimbawa, kung merong mga taong umaapi sa atin, o gumagawa ng mga hindi magagandang bagay ano ang ginagawa natin sa mga umapi sa atin? Binabangit ba natin ang salitang, “lintik lang ang walang ganti?” O pinapatawad natin sila at pinapalangin sa Ama na sila’y patawarin at pagpalain gaya ng ginawa ni Jesus sa mga nagpako sa Kanya sa krus? Sa simpleng salita ay ginagaya natin kung ano ang ginagawa ni Jesus sa bawat sitwasyon. Ang tanong muli ay nakikita ba ng iba na namumuhay tayo ng tulad ni Jesus?

Basahin natin ang mga talatang ito at nawa ay mangusap sa inyo ang Panginoon: 

1 Juan 2:6
“Sinumang nagsasabing nananatili siya sa Diyos ay dapat mamuhay tulad ng pamumuhay ni Jesu-Cristo."

Efeso 5:1-2
“1 Yamang kayo'y mga anak na minamahal ng Diyos, tularan ninyo Siya. 2 Mamuhay kayo nang may pagmamahal tulad ni Cristo; dahil sa Kanyang pagmamahal sa atin, inialay Niya ang Kanyang buhay bilang mabangong alay at handog sa Diyos.” 

Juan 13:13-17
“13 Tinatawag ninyo Akong Guro at Panginoon, at tama kayo, sapagkat ganoon nga Ako. 14 Kung Ako ngang Panginoon at Guro ninyo ay naghugas ng inyong mga paa, dapat din ninyong hugasan ang mga paa ng isa't isa. 15 Binigyan Ko kayo ng halimbawa upang inyong tularan. 16 Pakatandaan ninyo, ang alipin ay hindi nakakahigit sa Kanyang panginoon, ni ang sinugo kaysa sa nagsugo sa Kanya. 17 Ngayong alam na ninyo ito, pinagpala kayo kung ito'y gagawin ninyo.”

Efeso 4:22-24
“22 Iwan na ninyo ang dating pamumuhay. Hubarin na ninyo ang inyong dating pagkatao na nasisira dahil sa masasamang pagnanasa. 23 Magbago na kayo ng diwa at pag-iisip; 24 at ang dapat ninyong isuot ay ang bagong pagkatao na nilikhang kalarawan ng Diyos, at nahahayag sa matuwid at banal na pamumuhay ayon sa katotohanan.”

Efeso 2:5-8
5 Nawa'y magkaroon kayo ng kaisipan na tulad ng kay Cristo Jesus. 6 Kahit taglay Niya ang kalikasan ng Diyos, hindi Niya ipinagpilitang manatiling kapantay ng Diyos. 7 Sa halip, kusa Niyang binitawan ang pagiging kapantay ng Diyos, at namuhay na isang alipin. Ipinanganak Siya bilang tao. At nang Siya'y maging tao, 8 nagpakumbaba Siya at naging masunurin hanggang kamatayan, maging ito man ay kamatayan sa krus.”

Nawa ay maging sapat ang mga Salitang ito ng Panginoon na mangusap sa bawat isa sa atin na naririto at mahamon na tayo ay mamuhay na tulad ni Jesus.

(Utusan sila na sabihin sa kanilang mga katabi na mamuhay tayo na tulad ni Kristo).


Groupings:
Hatiin sila sa grupo na may dalawa hanggang tatlong miyembro lamang.

Pag-isipan:

1.    Bakit mahalaga sa isang taong nagsasabi na siya ay isang Kristiyano o disipulo ni Kristo ang        mamuhay na tulad ni Jesus?

2.    Ano ang posibleng dahilan kung bakit may mga taong nagsasabi na sila ay Kristiyano ngunit hindi nakikita sa buhay nila ang pamumuhay na tulad ni Jesus?

3.    Gusto mo bang maging katulad ni Jesus?

Pagsasabuhay:

1.    Ano sa tingin mo ang mga dapat mong gawin upang tayo ay makapamuhay ng tulad ni Jesus?

2.    Ano sa tingin mo ang mga dapat alisin o baguhin sa iyong buhay upang ikaw ay makapamuhay na
tulad ni Jesus?

Pananalangin:
Ipanalangin sa Diyos na tulungan tayong isabuhay ang mga ginawang desisyon sa pag-aaral na ito.

Sa susunod ay pag-aaralan naman natin ang bakit dapat nating gawin ang pagdidisipulo sa pangalawang bahagi n gating pag-aaral.