Discipleship - Session 3 (Ang Ano, Bakit, at Paano ng Pagdidisipulo - Bakit mahalaga ang magdisipulo?)

Ang Ano, Bakit, at Paano ng Pagdidisipulo
(Bakit Mahalaga ang Magdisipulo?)

Session 3

SESSION PREVIEW:

Pamagat: Ang Ano, Bakit, at Paano ng Pagdidisipulo – Bakit mahalaga ang magdisipulo?

 

Pangunahing Ideya: Mauunawaan ng lahat kung bakit dapat magdisipulo. Ang lahat ay kasali at walang nakaupo lamang.

Outline ng Ating Pag-aaral:

I. Ano ang Ibig Sabihin ng Pagiging Disipulo?

II. Bakit Mahalaga ang Mag Disipulo?
A. Dahil ito ay utos at hindi opsiyonal
B. Dahil ito ang pangunahing utos na nating gawin
C. Dahil ito ay hanggang sa katapusan ng mundo
D. Dahil ito ay utos na dapat sundin ng lahat ng mananampalataya
E. Dahil ito ang daan para maabot ang lahat sa mundo
F. Dahil ito ang paraan para ang Panginoon ay muling bumalik
G. Dahil ito ang madaling paraan para maabot ang lahat sa mundo
H. Dahil makakasama natin si Jesus
I. Dahil ito ang magiging daan upang mas maunawaan natin ang pag-ibig ni Jesus
J. Dahil ito ang paraan para tayo ay mas lumalim at lumago sa ating pananampalataya
K. Dahil ito’y kalooban ng Diyos - ang maging katulad ni Jesus
L. Dahil ito ang daan para matulungan natin ang ating Pastor

Baliktanaw:

Sa biyaya ng Diyos, nakita natin nakaraan kung ano ang ibig sabihin ng pagiging disipulo ni Jesus. Ito ay pagkakaroon ng matinding pagnanais na maging katulad ni Jesus sa pananalita, gawa, paglilingkod at pag-iisip. Gusto din nating gawin ang ginagawa Niya na nakakapagbigay kaluguran sa Diyos, at isa na dito ang pagdidisipulo din sa iba. Ano ba itong pagdidisipulo ng iba. Basically, ang ibig sabihin nito ay tutulungan mong makakilala ang isang tao kay Jesus at patuloy mo siyang tutulungang mamuhay na tulad ni Jesus. 

“Ang mga narinig mo sa akin sa harap ng maraming saksi ay ipagkatiwala mo rin sa mga taong may katapatan at may kakayahang magturo naman sa iba.” (2 Timoteo 2:2)

Kaya ang pangalawang tanong na titignan natin ay ang , “Bakit” ng pagdidisipulo.

II. Bakit Mahalaga ang Mag Disipulo?

Pagkatapos na muling mabuhay ni Jesus mula sa mga patay, iniwan ni Jesus ang Kanyang mga disipulo na may simpleng utos na kilala sa tawag na, “ang Dakilang Atas” (The Great Commission):

Matthew 28:18-20
18 And Jesus came and said to them, “All authority in heaven and on earth has been given to me. 19 Go therefore and make disciples of all the nations, baptizing them in the name of the Father and of the Son and of the Holy Spirit, 20 teaching them to observe all that I have commanded you. And behold, I am with you always, to the end of the age.”

Mateo 28:18-20
18 “Lumapit si Jesus at sinabi sa kanila, ‘Ang lahat ng awtoridad sa langit at sa ibabaw ng lupa ay ibinigay na sa Akin. 19 Kaya’t sa paghayo ninyo, gawin ninyong alagad ang lahat ng mga bansa, bautismuhan ninyo sila sa pangalan ng Ama at Anak at ng Espiritu Santo, 20 at turuan silang sundin ang lahat ng mga bagay na inutos Ko sa inyo. At narito, Ako’y kasama ninyong palagi, hanggang sa katapusan ng panahon.”

Bakit nga ba mahalagang pahalagahan natin ang pagdidisipulo?

A. Dahil ito ay utos at hindi opsiyonal

Una, pansinin ang talata 18 kung saan sinabi ni Jesus, “Ang lahat ng awtoridad sa langit at sa ibabaw ng lupa ay ibinigay na sa Akin.” Ito ay unang binanggit ni Jesus para makilala natin ang bigat ng utos na ito. Bilang Diyos at Panginoon ng buong sanlibutan, ibinigay ni Jesus ang utos sa ating lahat. Hindi Siya nakikiusap o nanghihikayat lang. Nag-uutos Siya. Kung hindi tayo susunod, nagkakasala tayo.

B. Dahil ito ang pangunahing utos na nating gawin

Sa English grammar na pag-interpreta sa talata, may makikita tayong apat na verb (action word): “Go”, “make disciple”, “baptizing” at “teaching”. Tatlo dito ay mga participle verb: “going”, “baptizing” at “teaching” at ang isa ay imperative verb o main verb, ang utos na - “make disciple.” Ang pangunahing kaisipan dito ay ang make disciple. Ang mga participle verb ang nagsasabi kung papaano natin magagawa ang main verb: ang humayo, ang mag bautismo at magturo. Hindi natin magagawa ang main verb na mag disipulo kung hindi natin kumpletong gagawin ang mga participle verb.

C. Dahil ito ay hanggang sa katapusan ng mundo

Isa pang mahalagang katotohanan mula sa Dakilang Atas ay, “Ako’y laging kasama ninyo hanggang sa katapusan ng panahon.” Malinaw na sinasabi ni Jesus na ang utos na ito ay gagawin hanggang sa katapusan ng sanlibutan.

D. Dahil ito ay utos na dapat sundin ng lahat ng mananampalataya

Isa sa maling kaisipan ng marami patungkol sa talata na ito ay binigay lamang daw ito sa mga apostol o ito ay para lang sa mga Pastor. Hindi lang Siya sa labing dalawa nag pakita dito, kundi sa mahigit limang daang katao. 1 Corinto 15:6, “Pagkatapos, nagpakita Siya sa mahigit na limangdaang kapatid na nagkakatipon.” Ibig sabihin binigay Niya ito hindi lang sa mga apostol o pastor kundi maging sa mga normal na tao na taga-sunod Niya.

Isa pang mahalagang bagay na makikita natin dito ang sinasabi sa Filipos 4:11-12,

11 At binigyan Niya ang ilan ng kaloob upang maging mga apostol, ang iba nama’y mga propeta, ang iba’y ebanghelista, at ang iba’y pastor at guro. 12 Ginawa Niya ito upang ihanda sa paglilingkod ang lahat ng mga banal, para sa ikatitibay ng katawan ni Kristo, ang iglesya.”

Makikita natin sa talata 12, na trabaho ng mga pastor na “ihanda sa paglilingkod ang lahat ng mga banal, para sa ikatitibay ng katawan ni Kristo, ang iglesya.” Malinaw na walang hindi kasali, lahat ay lingkod na dapat sumunod. Ito ay hindi gawain ng Pastor o ng ilan lang, ito ay gawain nating lahat na mga mananampalataya. Walang taga-palakpak lang, lahat ay manlalaro.

E. Dahil ito ang daan para maabot ang lahat sa mundo

Sa talata 19, “Go therefore and make disciples of all the nations,” ang salitang “nations” ay galing sa orihinal na salitang griyego na “Ta Ethne” kung saan galing ang English word na “ethnic” na ibig sabihin ay grupo ng mga tao. Ibig sabihin ang misyon natin ay abutin ang mundo sa pamamagitan ng pagdidisipulo.

Ayon kay Juan, nakita niya sa magiging katapusan ng lahat at sinulat sa Pahayag 7:9, “Pagkatapos nito’y nakita ko ang napakaraming tao na di kayang bilangin ninuman! Sila’y mula sa bawat bansa, lahi, bayan, at wika. Nakatayo sila sa harap ng trono at ng Kordero, nakadamit ng puti at may hawak na mga palaspas.”

Sa kabuuang plano ng Diyos makikita natin na may mga mananampalataya sa bawat bansa, lahi, bayan at wika. Ngunit ayon sa pag-aaral meron tayong 196 na bansa at meron tayong halos 16,000 na grupo ng mga tao. At mula dito meron pang 7,000 na hindi pa naaabot na grupo ng mga tao. Meron itong halos 3 bilyong tao. Ibig sabihin marami pang misyong dapat abutin. (Ngunit sa huling datos ay nasa 500 na lang na grupo ng tao ang hindi pa na aaabot sa panahon natin ngayon).

F. Dahil ito ang paraan para ang Panginoon ay muling bumalik

“Ipapangaral sa buong sanlibutan ang Magandang Balitang ito tungkol sa kaharian ng Diyos upang magsilbing patotoo sa lahat ng mga bansa. At saka darating ang wakas” (Mateo 24:14). At ito ang nakita ni Juan sa binasa natin kanina sa Pahayag 7:9. Kaya magsumikap tayo at lahat magtulungan upang maabot ang mga lugar na hindi pa naaabot ng ebanghelyo.

G. Dahil ito ang madaling paraan para maabot ang lahat sa mundo

Sabi ni Jesus sa Mateo 11:29-30, “Pasanin ninyo ang Aking pamatok at sundin ninyo ang Aking mga itinuturo sapagkat Ako’y maamo at mapagkumbabang loob. Sapagkat madaling dalhin ang Aking pamatok at magaan ang pasaning ibinibigay Ko sa inyo.” Ang pamatok ay sumisimbulo na may gagawing gawain. Sabi ni Jesus, meron Siyang gawaing ipapagawa sa atin at ito’y madaling dalhin at magaan ang pasaning ibibigay sa ating mga mananampalataya. Pero kung babalikan natin ang misyong iniwan Niya sa atin - ang abutin ang buong mundo, masasabi ba nating madali itong dalhin?

Marami ang gumawa ng misyong ito ayon sa sariling kaparaanan - pa concert, palakihin at pagandahin ang simbahan, mga pakulo at gimik para makaakay ng maraming tao sa simbahan. Ngunit ang bunga nito ay pagod, puyat, malaking budget at maraming meeting. Pero ang bunga nito ay hindi pangmatagalan. Ngunit ang kaparaanang binigay ni Jesus ang nag-iisang daan para mangyari ito - ang pagdidisipulo ng lahat ng mananampalataya. Tignan natin ito, paghambingin at pag-aralan:

Year           Gifted Pastor                          Discipler
1                      20,000                                     2
2                      40,000                                     4
3                      60,000                                     8
4                      80,000                                     16
5                      100,000                                   32
6                      120,000                                   64
7                      140,000                                   128
8                      160,000                                   256
9                      180,000                                   512
10                    200,000                                   1024
11                    220,000                                   2048
12                    240,000                                   4096   
13                    260,000                                   8192
14                    280,000                                   16,384
15                    300,000                                   32,758
16                    320,000                                   65,516
17                    340,000                                   131,032
18                    360,000                                   262,064
19                    380,000                                   524,128
20                    400,000                                   1,048256
21                    420,000                                   2,096,512
22                    440,000                                   4,193,024

May isang pastor na gifted na nagsimula ng isang gawain sa isang lungsod. Dahil sa siya ay gifted, sa bawat taon niya sa ministry ay nakakapagdala siya ng 20,000 na bagong mananampalataya sa kanilang bagong tayong gawain. Taon-taon ay parehong dami ang nadadagdag sa kanilang gawain. Kaya sa kanilang ika 22nd church anniversary sila ay umabot sa 440,000 na magkakapatid sa Panginoon.

Sa kabilang lungsod naman, may isang disciple maker na hindi ganoon ka gifted kumpara sa kabilang Pastor. Sa unang taon niya sa kanyang mission field nakaakay lamang siya at tumutok sa dalawang kaluluwa. Wala siyang preaching pag Sunday, wala siyang mga bible study, at ano pang mga iba pang gawain. Tumutok lang siya sa dalawa kung saan tinulungan at tinuruan niya silang mamuhay na tulad ni Jesus at hinanda para makapagdisipulo din ng iba. Sa sumunod na taon hinamon niya ang dalawa na makapag disipulo din nang tig-isa. Ginawa nila sa mga dinisipulo nila ang ginawa din sa kanila ng nagdisipulo sa kanila. Ganun ulit, walang Sunday preaching, walang mga Bible study, atbp. Tumutok lang sila sa mga ilang kaluluwa kaya sila ay naging apat sa ikalawang taon. Nagpatuloy ang ganitong gawain hanggang sa ika-22nd church anniversary nila at umabot sila ng 4,193,024 na mga kapatid sa Panginoon.

Hindi ko sinasabi na hindi mahalaga ang Sunday preaching, bible studies at iba pang gawain, sinabi ko lang ito upang ipakita kung gaano madaling dalhin ang pamatok at magaan ang pasaning ibinigay sa atin ni Jesus.

H. Dahil makakasama natin si Jesus

Madalas ay laman ng ating panalangin na tayo’y samahan ng Diyos sa lahat ng ating ginagawa. Ngunit may pangako si Jesus na binitawan sa huling bahagi ng talata 20, “At narito, Ako’y kasama ninyong palagi, hanggang sa katapusan ng panahon.” At makakamtan natin ito kung gagawin natin ang pinapagawa Niya - ang magdisipulo. Magiging madali ang pamatok na binigay sa atin hindi dahil sa ating galing, kundi dahil sa kasama natin si Jesus. Pinangako Niya na tutulungan Niya tayo sa pagdidisipulo para magawa ang pinapagawa Niya.

Filipos 4:13
“Ang lahat ng ito’y magagawa ko dahil sa lakas na kaloob sa akin ni Kristo.”

I. Dahil ito ang magiging daan upang mas maunawaan natin ang pag-ibig ni Jesus

Alam kong alam nating mahal tayo ng ating ina, pero kapag ikaw ay naging ina na rin at nakaranas na mabuntis at maranasan ang lahat ng hirap na nadaanan ng nanay mo, doon palang natin mas maiintindihan ang tunay na pag-ibig ng ating ina dahil tayo’y nasa kalagayan na niya. Ganun din sa ating Panginoong Jesus, alam kong alam natin na mahal Niya tayo, ngunit mas mauunawaan natin ng malalim ang pag-ibig Niya kapag nagdidisipulo na tayo. Doon palang natin mauunawaan kung gaano ang Kanyang pagtitiis, pagsasakripisyo at sakit na naranasan para tayo ay abutin. Magtutulak ito sa atin para mas lalo Siyang mahalin at sundin sa ating buhay.

J. Dahil ito ang paraan para tayo ay mas lumalim at lumago sa ating pananampalataya

Madalas ito rin ay laman ng ating panalangin - ang lumago sa ating pananampalataya. Sa pagdidisipulo habang hinahatak natin ang iba na mapalapit sa Diyos, sila rin ay ginagamit ng Diyos para itulak pa tayong mas mapalapit sa Diyos. Dahil kapag sinisimulan na natin silang turuan ng ilang pamumuhay na nais ni Jesus sa kanila, halimbawa ang  magbasa ng Biblia, sila ang magtutulak din sa atin na tunay na ito’y basahin, dahil nakakahiyang malaman ng mga disipulo natin na tayo mismo ay hindi nagbabasa o hindi pinamumuhay kung ano ang tinuturo natin. Magtutulak ito sa atin na intensyong ipamuhay ang ating mga tinuturo sa ating mga dinidisipulo. Ang tawag namin dito ay, “PUSH and FULL Factor.”

K. Dahil ito’y kalooban ng Diyos - ang maging katulad ni Jesus

Muli ayon sa binasa at na pag-aralan natin kanina sa Roma 8:28-29, “28. Alam nating sa lahat ng bagay ay gumagawa ang Diyos para sa ikabubuti ng mga nagmamahal sa Kanya, silang mga tinawag ayon sa Kanyang layunin. 29 Sapagkat sa mula’t mula pa’y alam na ng Diyos kung sino ang magiging Kanya at ang mga ito’y pinili upang maging tulad ng Kanyang Anak. Sa gayon, ang Anak ang naging panganay sa lahat ng maraming magkakapatid.” Malinaw na ito ay kalooban ng Ama mula’t mula pa, upang maging katulad ni Jesus.”

Dapat ay maging hangarin din natin ang hangarin ni Pablo sa Filipos 3:10, “Ang tanging hangarin ko ngayon ay lubusang makilala si Kristo, maranasan ang kapangyarihan si Kristo, maranasan ang kapangyarihan ng Kanyang muling pagkabuhay, makibahagi sa Kanyang mga paghihirap, at maging katulad Niya sa Kanyang kamatayan.”

L. Dahil ito ang daan para matulungan natin ang ating Pastor

Ito ang daan para matulungan natin ang ating Pastor na magkaroon ng maraming oras sa kanyang pamilya at sa mas mahalagang gawain sa paglilingkod. Isa sa mapapansin natin na karamihan ng mga masisipag na Pastor sa gawin ay may hindi mabuting patotoo sa pamilya. Laging galit ang asawa, mga anak na pasaway (nabuntis ng maaga o nakabuntis, o mga rebelde). Ito ay dahil walang maraming oras ang Pastor natin na nailalaan sa kanyang pamilya kaya sila’y hindi nagiging mabuting modelo. Isa sa mga dahilan nito ay dahil ang mga miyembro nito ay hindi naihanda (na equip) sa pagdidisipulo.

Kapag ang ilan sa mga kapatiran ay may nabahagian silang kaibigan at bukas sa bible study, lalapit sila kay Pastor at sasabihing, “Pastor praise God! Nakapag share ako sa kaibigan ko. Open daw siya sa bible study. Paki puntahan nyo po.” Kaya ang kawawang Pastor bibitawan niya ang ilang oras para sa pamilya niya para magamit ang oras na iyon sa pagbible study. Imagine nyo kung lahat ay ganoon. Talagang hindi kataka-taka ito sa mga Pastor na masasabing masipag dahil sa isang araw halos apat o higit pa ang kanyang bible study. Kaya pagdating sa bahay wala na siyang oras sa pamilya dahil sa pagod at mas gugustuhing magpahinga kaysa magkaroon ng oras sa pamilya.

Alam kong marami pang dahilan kung bakit mahalaga na ang bawat-isa ay dapat mag disipulo at mapag-aaralan natin ito. Pero nakita na natin ngayon ang ilang pangunahing dahilan kung bakit mahalaga ang magdisipulo. Ang tanong nalang sa atin ngayon ay, papaano ba natin ito gagawin? Iyan ang titignan natin sa susunod na pag-aaral sa biyaya ng Diyos.



POST SESSION DISCUSSION QUESTIONS:
Pag-usapan sa maliit na grupo:

Pag-isipan

1. Ibigay ang labing dalawang dahilan kung bakit dapat mag disipulo? Alin sa mga ito ang pinaka naghikayat sayo para magdisipulo ng iba?

2. Pwede ba na ang isang nagsasabing Kristiyano ay hindi magdisipulo? Bakit?

3. Ano ang humahadlang sayo para gawin ang magdisipulo?

Pagsasabuhay:

1. Sino ang mga taong ipinapanalangin mo na mabahaginan ng Magandang Balita at ma-idisipulo?

Panalangin:
Ipanalangin sa Diyos na tulungan tayong isabuhay ang mga ginawang desisyon sa pag-aaral na ito.