Discipleship - Session 6 (Maging Malinaw ang Inyong D.N.A.)

 

Maging Malinaw ang Inyong D.N.A.

Session 6

SESSION PREVIEW:

Pamagat: Maging Malinaw ang Inyong D.N.A.

Pangunahing Ideya: Maunawaan kung bakit mahalaga ang pagkakaroon ng malinaw na D.N.A. sa inyong iglesya. Makakatulong ito para mas magkaisa ang iglesya sa sama-samang pagsunod sa missyong iniwan sa atin ng Diyos.

Outline ng Ating Pag-aaral:

I. Ang D.N.A.
A. Ano ba ang D.N.A.?
B. Kahalagahan ng D.N.A. sa ating iglesya

II. Mission
A. Ano ang Mission?
B. Bakit dapat tayo magkaroon ng malinaw na Mission?

III. Vision
A. Ano ang Vision?
B. Ang Pinagkaiba ng Mission at Vision
C. Bakit natin kailangan ng malinaw na Vision? 

IV. Core Values
A. Kahulugan ng Core values

Panimula:

Narito ang motto ng ilang mga kilalang unibersidad sa buong mundo:

Ø  Harvard University

          Founded 1636

“To be plainly instructed and consider well that the main end of year life and studies is to know God and Jesus Christ.”

Ang nakalagay sa diploma ng mga nagsisitapos dito ay:

“Veritas Christo et Ecclesiae” (Truth for Christ and the Church)

Ø  Yale University

           Founded 1701

“Every student shall consider the main end of his study to wit to know God in Jesus Christ and answerable to lead a Godly sober life.”

Sila ay mga seminaryo pero ngayon ang mga eskwelahan na ito ay hindi na nagtuturo patungkol sa Diyos; hindi na nila pinag-uusapan dito ang patungkol kay Jesus. Ngayon ang Harvard at Yale ay hindi na nagtataguyod ng mga kahalagahan kay Kristo o ang gawin ang kanilang pangunahing layunin. Papaano ito nangyari?

Bakit natin tinitignan ang mga nakakalungkot na bagay na ito? Ang hinaharap ng kahit anong kilusan gaya ng ating iglesya ay tanging nakadipende sa katapatan ng mga nangunguna nito na panghawakan ang kanilang D.N.A. Dito papasok ang kahalagahan ng pagpapahalaga sa kanilang D.N.A.

I. Ang D.N.A.

A. Ano ba ang D.N.A.?

Ang D.N.A. ay ang tinatawag nilang nagtatagubilin sa buhay. Ang ibig sabihin ng D.N.A. ay Deoxyribonucleic Acid at ito ay isa sa dalawang uri ng nucleic na makikita sa ating cells. Ang D.N.A. ang talaan ng tagubilin na nagsasabi sa cell kung ano ang trabahong gagawin. Pamilyar tayo sa D.N.A. dahil kadalasan natin itong naririnig sa mga napapanood nating mga palabas sa TV, na para malaman kung sila ay magkamag-anak. Dumadaan sila sa D.N.A. test at kapag nag tugma ang D.N.A. sample na kinuha at sinuri mula sa kanila masasabing sila’y magkamag-anak.

Kapag pinag-usapan naman natin ang D.N.A. ng isang organisasyon o samahan ibig sabihin nito ang mga sumusunod:
• Ang Mission
• Ang Vision
• Ang Values

B. Kahalagahan ng D.N.A. sa ating iglesya

Bawat tao ay merong natatanging pagkakakilanlan o D.N.A. Ganoon din sa bawat lokal na iglesya, merong kanya-kanyang binubuong pagkakakilanlan o D.N.A. Ang mga natatanging pagkakakilanlan ng iglesya ang huhulma sa sari-saring uri ng elemento na nakakaimpluwensya sa pangkalahatang dinamika (dynamics-proseso o sistema) at modelo. Mahalaga ang pagkakaroon ng malinaw na D.N.A sa isang lokal ng iglesya. Bakit?

Una, proteksyon sa kaguluhan. May isang mayamang negosyante ang humihingi ng tulong sa isang kilalang palabas sa t.v. na mahanap ang kanyang mga magulang. Marami ang nag sulputang taong nagsasabi na sila ang mga magulang ng mayamang lalake. Kaya duda ng iba na ito ay nangyari dahil sa yaman ng lalake. Para maproteksyunan ang lalake sa mga maling paghahabol sa pagiging magulang niya na maaaring magdulot ng kaguluhan sa buhay nya, dumaan ang bawat-isa sa pagsusuri na tinatawag na D.N.A. test. At sa huli ay nanaig ang katotohanan dahil sa nagtugmang D.N.A sample na kinuha sa lalake at sa tunay na magulang nito. Ganito din sa ating iglesya. Tandaan natin ang sinasabi sa Juan 10:10, “Dumarating ang magnanakaw para lamang magnakaw, pumatay, at manira.” Meron tayong kaaway na ganito ang laging hangarin sa bawat iglesya ng Diyos. Gagawin nya ang lahat para sirain ang pagkaka-isa ng iglesya ng Diyos.

Minsang naging biruan ng mga nagkita-kitang mga Pastor ng tinanong ang isang Pastor kung nakaranas na ba ang kanilang iglesya ng pagkakahati. Sumagot ang tinanong na pastor na, “wala pa.” Pabirong sinabi ng nagtanong na pastor na, “ai, hindi ka tunay na Baptist, kasi hindi pa kayo nag karoon ng pagkakahati.” Tila naging normal kasi ngayon sa maraming iglesya ang pagkakahati-hati dahil sa mga kaguluhang nangyayari sa kalagitnaan nila. Sa aking karanasan karamihan sa nagiging dahilan ng pagkakahati-hati ay kapag may ibang pagkakakilanlan o D.N.A. na nakapasok na galing sa ibang iglesya. Ito ay maiiwasan kung merong malinaw na D.N.A. na alam ng bawat kaanib ng isang lokal na iglesya at sa mga gusto o magiging bahagi ng iglesya.

Pangalawa, magpatuloy ang iglesyang naitatag. Kanina nakita natin ang bahagi ng D.N.A - ang mission, ang vision, at ang values. Kapag napanatili ang mga ito, ang isang samahan ay magpapatuloy at uunlad. Pero kung nakalimutan ang mission, vision at walang core values para tulungan ang isang samahan, ang kahit anong organisasyon o samahan na ganito ay tiyak na lalayo o lilihis sa paksa nito at kapag nangyari ito hindi na mahalaga sa kanila kung ano na ang ginagawa nila. Hindi na sila tapat sa orihinal na layunin nila.

II. Mission

A. Ano ang Mission?

1. Isang pangkalahatang pahayag ng layunin na nagpapahayag ng pangkalahatang ideya ng kung ano ang nais ng Diyos na magawa natin

Sa madaling salita kapag tinawag tayo ng Diyos, nilalagay Niya sa ating puso ang mission na kailangan nating gawin. Kung tayo’y tunay na taga-sunod ni Kristo sinasabi ng Bibliya na tayo’y ligtas na. Bakit hinahayaan pa tayo ng Diyos na mabuhay pa sa mundong ito sa halip na kunin na Niya at umuwi na sa piling Niya agad? Dahil naniniwala ako na may nilagay ang Diyos sa atin na dapat nating gawin. Ang bawat-isa sa atin ay may mission sa buhay. Halimbawa nito yung makikita natin sa Genesis 12:1-3.

Genesis. 12:1-3
1 Sinabi ni Yahweh kay Abram, “Lisanin mo ang iyong bayan, ang tahanan ng iyong ama at mga kamag-anak, at pumunta ka sa bayang ituturo Ko sa iyo. 2 Pararamihin Ko ang iyong mga anak at apo at gagawin Ko silang isang malaking bansa. Pagpapalain Kita, at gagawin Kong dakila ang iyong pangalan at ikaw ay magiging pagpapala sa marami. 3 Ang sa iyo'y magpapala ay Aking pagpapalain, at ang sa iyo'y sumumpa ay Aking susumpain; sa pamamagitan mo, lahat ng mga bansa sa daigdig ay Aking pagpapalain.”

Malinaw dito yung layunin ng Diyos sa buhay ni Abram na siya ay magiging ama ng maraming bansa; siya ay magiging ama ng Israel. Iyan ang mission ni Abram na binigay ng Diyos sa kanya. Sumunod ba si Abram? Yes, ginawa nya. Kaya kapag pinag-uusapan natin ang ating mission ito ay patungkol sa kung ano ang gustong ipagawa sayo ng Diyos o kung saan ka gusto dalhin ng Diyos.

2. Isang gawaing ibinigay sa isang tao o pangkat upang maisagawa

Exodo 3:10
“Kaya't papupuntahin Kita sa Faraon upang ilabas mo sa Egipto ang Aking bayang Israel.”

Dito makita natin na may gawain ang Diyos para kay Moises na dapat niyang gawain. Ang mission na binigay kay Moises ay ang pumunta siya sa Faraon upang ilabas ang bayan ng Diyos sa Egipto. Isa pang halimbawa ay sa…

2 Samuel 5:2
“Nang si Saul pa ang hari namin, pinangunahan mo ang mga kawal ng Israel sa pakikipagdigma. Ipinangako sa iyo ni Yahweh na ikaw ang magiging pastor ng Israel at ikaw ang mamumuno sa Kanyang bayan.”

Ano naman ang mission na ibinigay kay David dito? Kailangan niyang maging pastor ng Israel at mamamuno sa Israel. Isa pang halimbawa na titignan natin ay sa…

Gawa 13:2
“Habang sila'y nag-aayuno at sumasamba sa Panginoon, sinabi sa kanila ng Espiritu Santo, “Ibukod ninyo sina Bernabe at Saulo. Sila'y pinili Ko para sa tanging gawaing inilaan Ko sa kanila.”

Dito naman ang mission na binigay kina Bernabe at Saulo na sila’y pinili at inilaan sa tanging gawaing ibibigay sa kanila para sa mga Hentil. Mapapansin natin na ito man ay sa Lumang Tipan o Bagong Tipan ang Diyos ay nagbibigay ng gawain sa atin na kailangan nating gawin. At iyan ang ating magiging mission sa buhay.

Kayo sa tingin ninyo ano kaya ang mission ni God para sa inyo? Ano kaya ang gusto Niyang ipagawa sa inyo?

3. Tinutukoy nito ang layunin at binibigyang katwiran ang dahilan kung bakit tayo nabubuhay sa mundong ito.

1 Timoteo 2:7
“Dahil dito, ako'y pinili upang maging mangangaral, apostol at tagapagturo ng pananampalataya at katotohanang ito para sa mga Hentil. Totoo ang sinasabi kong ito, at hindi ako nagsisinungaling!”

Makikita natin dito na naniniwala siya na ang layunin ng Diyos sa kanya ay ang mangaral sa mga Hentil. Dahil malinaw sa kanya ang dahilan kung bakit siya nabubuhay dito sa mundo.

Filipos 1:21
“Sapagkat para sa akin, si Kristo ang aking buhay at kahit kamatayan ay pakinabang.

B. Bakit dapat tayo magkaroon ng malinaw na Mission?

1. Para matukoy ang ating prayoridad 

Gawa 6:1-4
1 Patuloy ang pagdami ng mga mananampalataya at dumating ang panahong nagreklamo ang mga Helenista laban sa mga Hebreo. Sinabi nilang ang mga biyuda sa pangkat nila ay napapabayaan sa pang-araw-araw na pamamahagi ng ikabubuhay. 2 Kaya't tinipon ng Labindalawa ang buong kapulungan ng mga mananampalataya at sinabi sa kanila, “Hindi namin dapat pabayaan ang pangangaral ng salita ng Diyos upang mangasiwa sa pamamahagi ng ikabubuhay. 3 Kaya, mga kapatid, pumili kayo sa mga kasamahan ninyo ng pitong lalaking iginagalang, puspos ng Espiritu, at matatalino upang ilagay namin sila sa tungkuling ito. 4 Samantala, iuukol naman namin ang aming panahon sa pananalangin at sa pangangaral ng salita.”

Dito makikita natin na malinaw sa mga apostol ang kanilang layunin at prayoridad. Alam nila ang kanilang mission at ito ay ang mangaral ng Salita ng Diyos at hindi ang mangasiwa sa pamamahagi ng ikabubuhay. Kapag hindi malinaw ang mission natin ang lahat ay pupunta sa atin at aalukin tayo ng mga programa o adyenda nila dahilan para maubos ang oras at lakas natin sa bagay na hindi natin prayoridad. Hindi rin tayo gagawa basta-basta ng mga programa, ministry, o gawain na hindi ayon sa ating prayoridad.

Mateo 6:33
“Ngunit higit sa lahat ay pagsikapan ninyo na kayo'y pagharian ng Diyos at mamuhay nang ayon sa Kanyang kalooban, at ibibigay Niya sa inyo ang lahat ng inyong pangangailangan.”

2. Napapanatili tayong naka-pokus 

Filipos 3:14
“14 Nagpapatuloy nga ako patungo sa hangganan upang makamtan ang gantimpala ng pagkatawag sa akin ng Diyos sa pamamagitan ni kristo Jesus, ang buhay na hahantong sa langit.”

Hindi nawawala ang pokus ni Pablo ayon sa mga talatang ito. Ganun din ang mangyayari sa atin kung malinaw sa atin ang ating mission. Naaalis natin ang mga ilang bagay na walang kinalaman sa ating pagkatawag. Dahil kung hindi malinaw sa atin ang mga ito maaaring maging malaking bagay ang ilang mga maliliit na bagay sa atin.

3. Nakakaakit ito ng kooperasyon

Nehemias 2:17-18
“17 Pagkatapos, sinabi ko sa kanila, ‘Nakikita ninyo ang kalunus-lunos na kalagayan ng ating bayan.
Wasak ang Jerusalem at sunog ang mga pintuan nito. Itayo nating muli ang pader ng lunsod upang mahango na tayo sa kahihiyan.’ 18 At sinabi ko sa kanila kung paano ako pinagpala ng Diyos at kung ano ang sinabi sa akin ng hari.”

Nehemias 4:6
“Lalo kaming nagpatuloy sa pagtatayo ng pader, kaya't hindi nagtagal at nangalahati na ang taas nito dahil masigasig ang mga tao sa pagtatrabaho.”

Nehemias 6:15
“Pagkaraan ng limampu't dalawang araw na paggawa, natapos ang pader noong ikadalawampu't limang araw ng ikaanim na buwan.”

Papaano nangyari ito? Dahil ibinahagi ni Nehemias sa mga tao ang mission na binigay sa kanya ng Diyos na naging dahilan para magka-isa ang lahat at makikooperasyon. Wala naman siguro sa atin ang gusto na ang ating iglesya ay parang bote sa dagat na palutang-lutang at bahala na kung saan papunta. Hindi naman sana natin plano at makuntento na maupo nalang sa upan sa simbahan kada may gawain dahil hindi ito ang plano ng Diyos sa Kanyang mga anak.

4. Naihahanda tayo nito sa buhay na walang hanggan

2 Timoteo 4:6-7
“6 Sapagkat dumating na ang panahon ng pagpanaw ko sa buhay na ito. Ako'y mistulang isang handog na ibinubuhos sa dambana. 7 Pinagbuti ko ang aking pakikipaglaban, natapos ko na ang dapat kong takbuhin, at nanatili akong tapat sa pananampalataya.”

Makikita natin dito na nang haharap na si Pablo sa kamatayan sinabi niya na handa na siyang makita ang Diyos dahil nagawa na niya ang pinapagawa sa Kanya ng Panginoon. Tulad niya hinihahanda tayo nito sa buhay na walang hanggan. Alam nyo kung ano yung nakakatakot? Kapag haharap na tayo sa Diyos at tinanong tayo kung ano ang ginawa natin at sinabi natin ang mga pinag-gagawa natin dito tapos sabihin Niya, “Hindi Ko naman pinapagawa iyan sayo.” Kaya maingat ang iglesyang ito na gawin ang malinaw na pinapagawa ng Diyos sa Kanyang Salita.

5. Nababawasan ang mga kabiguan at problema

Kapag hindi malinaw sa atin ang ating mission lahat na lang sa atin ay magmumungkahi ng kanya-kanyang agenda o program at ito ay maaaring magdulot ng problema dahil hindi lahat ng programa ay ayon sa ating mission.

6. Matutulungan ang mga pagsusuri

Matulungan sa pagsusuri ang mga pastor, leaders sa kung ang ating mga ginagawa ba tulad ng isang programa, ministry, o gawain ay dapat magpatuloy o hindi. Alam nyo maraming mga programa sa karamihang church na may buhay na walang hanggan. Napakahirap na ito ay alisin sa kanila. Patuloy lang nilang ginagawa ang mga ito kahit na wala na itong impact o wala ng magandang resulta. Kaya dapat na maging matapang na alisin ang mga nakitang hindi nakakatulong na gawain sa ating pagkatawag sa pagsusuring nagawa.

7. Napo-protektahan ang organisasyon

Gusto natin protektahan ang future ng iglesyang ito.

8. Naitataguyod ang pagkaka-isa

Naitataguyod ang pagkakaisa sa ating iglesya. Kung may aalis man sa iglesyang ito hindi natin ganoon dapat ikalungkot, bakit? Dahil kapag ang ating mission ay malinaw aalis ang mga taong ayaw maki-isa sa mga ito. Hindi ibig sabihin na masaya ang church pag may umaalis, kundi hindi natin hinahayaan ang damdamin para makompromiso ang mission. Kaya naihihiwalay natin ang mga hindi makikiisa sa mga makikiisa. Mas mainam ang kakaunti pero lahat ay nagkakaisa sa mission.

Huwag tayong matakot na may mga tao na hindi sumasang-ayon sa atin dahil hindi natin sinasabi na tayo lang ang best at tamang iglesya. Ang sinasabi natin dito ay… ito ay ating tinatayuan, ito ang ating mission. Kaya ito dapat ang maging kaisipan natin na tayo’y bahagi lamang ng isang nakakamanghang programa ng Diyos. Pero huwag tayong maging mayabang at maging maingat na ibaba ang ibang iglesya pero yakapin natin kung ano ang binigay ng Diyos sa atin.

III. Vision 

A. Ano ang Vision?

Ang Vision ay isang larawan kung ano ang mangyayari kung matutupad ang ating mission. Pinapakita nito sa atin ang hinaharap bago pa ito mangyari.

Genesis 13:14-17
14 Pagkaalis ni Lot, sinabi ni Yahweh kay Abram, “Tumanaw ka sa palibot mo. 15 Ang buong lupaing natatanaw mo ay ibibigay Ko sa iyo, at sa magiging lahi mo magpakailanman. 16 Ang iyong mga salinlahi ay gagawin Kong sindami ng alikabok sa lupa na di kayang bilangin ninuman. 17 Libutin mo na ang buong lupain; ang lahat ng iyan ay ibibigay Ko sa iyo.”

Nang panahon na ibinigay ng Diyos kay Abram ang vision na ito sa kanya ay wala silang anak dahil ang asawa niya ay baog. Ngunit ng ito ay ibinigay sa kanya ito ang naging ispirasyon niya na gawin ang mission na binigay sa kanya dahil siya ay naniniwala sa sinabi ng Diyos.

B. Ang Pinagkaiba ng Mission at Vision

Marami ang nalilito sa kung ano ang pinagkaiba ng mission at vision. Kaya tignan natin ang bagay na ito.

MISSION	VISION
Mateo 28:19-20  “Kaya, humayo kayo at gawin ninyong alagad Ko ang lahat ng bansa. Bautismuhan ninyo sila sa ngalan ng Ama at ng Anak at ng Espiritu Santo, at turuang sumunod sa lahat ng ipinag-utos Ko sa inyo. Tandaan ninyo: Ako’y laging kasama ninyo hanggang sa katapusan ng sanlibutan.”	Pahayag 7:9  “Pagkatapos nito’y nakita ko ang napakaraming taong di kayang bilangin ninuman! Sila’y mula sa bawat bansa, lahi, bayan, at wika. Nakatayo sila sa harap ng trono at ng Kordero, nakadamit ng puti at may hawak na mga palaspas.”

Ano ang makikita nating pinagkaiba ng mission at vison mula sa mga talatang ito?

MISSION	VISION
Pahayag	Larawan, retrato
Kung ano ang dapat nating gawin	Kung ano ito sa hinaharap
Nagpapabatid	Nagbibigay inspirasyon
Sa ulo	Sa puso
Una	Pangalawa

 
C. Bakit natin kailangan ng malinaw na Vision?

Sabi ni Helen Keller,
“Ang tanging malala kaysa pagiging bulag ay ang pagkakaroon ng tingin pero walang vision.”

Limang taon mula ngayon ano ang nakikita mong vision sa…

1. … iyong sarili pagdating sa espirituwal na buhay?

2. … iyong ministeryo – pagdidisipulo, etc.

Bakit mahalaga ang mga tanong na ito? Kung tayo ay maglilingkod sa Diyos at wala tayong nakikitang vision sa ginagawa natin madali sa atin ang mapagod at sumuko.

Sabi naman ni E. Paul Hovey
“Ang mundo ng isang bulag ay nakalimita sa mga hangganan ng kanyang nahahawakan, ang mundo naman ng isang ignorante ay nakalimita sa kanyang vision.”

Ang isa sa mga abilidad ng isang mabuting leader ay ang makita ang hinaharap sa kung ano ang meron sila ngayon. Kaya, bakit natin kailangan ng Vision?

1. Dahil ang Vision ay nagbibigay sa atin ng direksyon at kumpiyansa

Kawikaan 29:18
“Ang bansang walang patnubay ng Diyos ay puno ng kaguluhan, ngunit mapalad ang taong sumusunod sa Kautusan.”

Gawa 18:9-11
“9 Isang gabi, sinabi ng Panginoon kay Pablo sa pamamagitan ng isang pangitain, “Huwag kang matakot! Ipagpatuloy mo ang iyong pangangaral! Anuman ang mangyari'y huwag kang titigil 10 sapagkat Ako'y nasa iyo. Hindi ka maaano sapagkat marami Akong tagasunod sa lunsod na ito.” 11 Tumigil nga siya roon at ipinangaral niya ang salita ng Diyos sa loob ng isang taon at kalahati.”

Kung meron tayong malinaw na vision kikilos tayo gaano man ito kahirap. Dahil inaaliw tayo nito na ano man ang mga pagsubok na ating haharapin alam na natin kung ano ang magiging katapusan nito. 

2. Dahil ang Vision ay gagawin tayong nagkakaisa at epektibo

Nehemias 2:17-18
“17 Pagkatapos, sinabi ko sa kanila, “Nakikita ninyo ang kalunus-lunos na kalagayan ng ating bayan. Wasak ang Jerusalem at sunog ang mga pintuan nito. Itayo nating muli ang pader ng lunsod upang mahango na tayo sa kahihiyan.” 18 At sinabi ko sa kanila kung paano ako pinagpala ng Diyos at kung ano ang sinabi sa akin ng hari.

Nehemias 6:15
“Pagkaraan ng limampu't dalawang araw na paggawa, natapos ang pader noong ikadalawampu't limang araw ng ikaanim na buwan.”

Kapag malinaw sa bawat-isa sa atin ang napakalaking vision na binigay ng Diyos sa atin pagkaka-isahin tayo nito at magiging epektibo dahil ang lahat ay kumikilos ayon sa mission na binigay.

3. Dahil ang Vision ay nagbibigay inspirasyon sa pagnanasa at nagtataguyod ng Kahusayan

Juan 4:35
“Hindi ba sinasabi ninyo, ‘Apat na buwan pa at anihan na’? Sinasabi Ko naman sa inyo, masdan ninyo ang mga bukid, hinog na ang trigo at handa nang anihin.”

Kung alam natin kung saan tayo pupunta, kung naibigay ng malinaw at maayos sa atin ang vision, magdudulot ito sa atin ng pasyon o pagnanasa at nagtataguyod ng may kahusayan.

Ngayon, ano ang mission at vision ng ating iglesya. Iyan ang titignan natin sa susunod na pag-aaral.

IV. Core Values

A. Kahulugan ng Core values

1. Ang Core Values ang nagsasabi sa kung “sino tayo” at “papaano” natin sa tamang order para magawa natin ang ating mission-vision.

2. Ang values ang pinaka-importante sa isang oganisasyon kung saan ginagabayan nito ang proseso ng paggawa ng desisyon.

Iba pang salita para sa core values ay “culture” ng organisasyon. Ang pinakamahirap na pwedeng magawa ng mga leader ay palitan ang isang culture. Maraming mga toxic culture na mahirap mabago. Halimbawa sa isang pamilya, pagpasok mo palang sa bahay nila malalaman mo na agad kung ano ang culture nila.

Anong kultura ba ang gusto nating meron tayo? Na kapag may bisita o pumuntang ibang tao sa ating gawain ay mapupuna nila agad ang kulturang ito?

Nakita na natin nakaraan na lahat tayo ay disciple-maker. Ibig sabihin lahat ay magiging leader. Kung may mga tao na pupunta sa mga gawain natin anong kultura ang gusto nating makita nila?

Buod:

Ang tanong ngayon sa ating ay malinaw ba sa bawat isa sa mga miyembro ninyo sa iglesya niyo ang D.N.A. nyo? Nawa nakita na ninyo ang kahalagahan ng pagkakaroon ng malinaw na D.N.A. sa bawat miyembro ng inyong iglesya.

Sa paggawa ng Mission, Vision at Core Values sikapin itong maikli at madaling makabisado o matandaan. Pwede ding gumamit ng acronym sa paggawa nito. Siguraduhing ito ay mula sa Dakilang Utos at Dakilang Atas na malinaw na binigay sa atin ng Panginoon.

Narito ang halimbawa ng aming Mission, Vision, at Core Values:

Our mission is to H.E.L.P.
To Honor God and to
Equip the saints who will
Lead other
People to Christ

Our Vision is to see C.H.R.I.S.T.
To see a movement of millions of
Christ – centered and committed followers meeting in
House churches in all places;
Restored Acts type Christian communities that have an
Intimate relationship with the Lord; Growing in
Small groups;
Transforming lives, families, communities and nations, for the glory of God.

Our Core Value is to… L.E.A.D.
L – Love God, Love Others
E – Engage the Family
A – Abide in charity and unity
D – Disciple People



POST SESSION DISCUSSION QUESTIONS:
Pag-usapan sa maliit na grupo:

Pag-isipan:

1. Ano ang D.N.A.? Bakit ito mahalga?

2. Ano ang Mission, Vision at Core Values?

Pagsasabuhay:

1. Ano ang maaari mong gawin para mas at palaging maging malinaw ang inyong D.N.A. sa bawat-isa sa inyong iglesya?

2. Ano ang D.N.A. ng iyong iglesya? (Mission, Vision, at Core Values)

3. Gumawa ng iyong personal na Mission at Vision at Core Values - Sa iyong sarili at ministeryo:

a. Sa loob ng isang taon:

b. Sa loob ng isang buwan:

Panalangin:
Ipanalangin sa Diyos na tulungan tayong isabuhay ang mga ginawang desisyon sa pag-aaral na ito.